Francuzskaja palicyja rasśleduje zahadkavaje zabojstva: jość zatrymany, ale niama cieła

«Za 23 hady pracy ŭ sudzie ja ni razu z takim nie sutykaŭsia, — razvodzić rukami dziaržaŭny abvinavaŭca Remi Kuten. — U nas niama cieła, i my nie viedajem asoby čałavieka, jaki, jak nam zdajecca, byŭ zabity».

Što ŭ palicyi jość, tak heta padazravany. 46-hadovy palak, imia jakoha trymajuć u sakrecie, šmat hadoŭ žyŭ u Francyi i pracavaŭ cieślarom, ciapier jon pad aryštam.

Śledčyja miarkujuć, što sprava była tak: padazravany, budučy napadpitku, jechaŭ za styrnom svajoj čornaj Audi i źbiŭ žančynu na rovary niepadalok ad miastečka Burhterułd za 150 km na paŭnočny zachad ad Paryža.

Padumaŭ, što zabiŭ jaje i pajechaŭ dadomu pa rydloŭku. Ale kali viarnuŭsia, vyjaviŭ, što žančyna jašče žyvaja. Palicyja ŭpeŭnienaja, što tady jon vyrašyŭ dabić jaje rydloŭkaj, potym zakapaŭ, a rovar vykinuŭ na śmietnik.

Nievialikaja zahvazdka: vielmi mała dokazaŭ taho, što ŭsio mienavita tak i było. Ni cieła, ni pryznańnia, ni rovara. U daviaršeńnie — nivodnaj zajaŭki ab źnikłaj žančynie.

Praz dva miesiacy paśla taho, što zdaryłasia, 14 maja, eks-siabroŭka padazravanaha źjaviłasia ŭ palicejski ŭčastak u Djepie i raspaviała, što jaje były patelefanavaŭ pjanym 9 sakavika i pryznaŭsia, što zabiŭ žančynu ŭ avaryi.

Heta była jaho pieršaja viersija. Paźniej znoŭ patelefanavaŭ i zajaviŭ, što ŭsio dobra: žančyna žyvaja i pajšła dadomu.

Siabroŭka zachvalavałasia i na nastupny dzień vyrašyła svajho byłoha naviedać. Doma jaho nie akazałasia, ale na łabavym škle jaho mašyny była ŭvahnutaść ź vialikaj čyrvonaj plamaj. 13 sakavika joj usio-taki atrymałasia ź im pahavaryć. Tady jon i vykłaŭ u detalach historyju pra zabojstva rydloŭkaj. Viełasipiedystka, pa jaho słovach, była padobnaja da biazdomnaj.

Jašče troje śviedak čuli ad padazravanaha try inšyja viersii zdareńnia.

Adna sa znajomych zajšła da padazravanaha dadomu paźniej u dzień avaryi i zaśpieła jaho za nastupnaj pracaj: jon lichamankava adciraŭ paškodžanuju mašynu. Joj jon skazaŭ, što źbitaja žančyna vyžyła. Znajomaja na ŭsialaki vypadak usio roŭna sfatahrafavała mašynu, i ciapier heta adzin z klučavych dokazaŭ u spravie.

Inšy fakt suprać padazravanaha — toje, što jon abviaściŭ ab kradziažy Audi, jakuju znajšli abharełaj u siaredzinie krasavika. Paźniej jon pryznaŭsia palicyi, što sam ža jaje i padpaliŭ.

U červieni jaho aryštavali, i tady jon abviaściŭ, što ŭsio heta niaŭdały žart — jon vydumaŭ historyju, kab razžalić svaju byłuju siabroŭku. Sam paškodziŭ łabavoje škło i razmazaŭ pa im kurynuju kroŭ.

Potym pryznaŭ, što avaryja ŭsio ž była, a potym znoŭ staŭ paŭtarać pra drenny žart.

Palicyi treba terminova znajści achviaru, chtości ž pavinien byŭ paciarpieć u toj avaryi.

«Jość masa źnikłych ludziej, pra jakich nie paviedamlajuć palicyi», — narakaje prakuror Kuten.

Jość vierahodnaść, što źbitaja žančyna była turystkaj abo inšaziemkaj, u jakoj byŭ druhi dom u Francyi. Moža być, heta viełasipiedystka, jakaja puściłasia ŭ dalokaje padarožža. Moža być, hetaja žančyna prosta žyła ŭ izalacyi, u adryvie ad svajoj siamji i siabroŭ.

U zakliku da mahčymych vidavočcaŭ zdareńnia, apublikavanym palicyjaj, achviara apisana jak žančyna 40—60 hadoŭ, z zaplečnikam, na rovary i, mahčyma, z torbami, prymacavanymi da bahažnika. Ničoha bolš palicyja pra jaje nie viedaje.

• 3
• 0
• 1
• 6
• 34
• 12
• 3
• 0