Papularnaja ŭ Rasii ŭkrainskaja śpiavačka Śviatłana Łabada, jakaja płanavała kancertny tur pa bujnych haradach Litvy, budzie dadadzienaja ŭ śpis niepažadanych u Litvie asob, zajaviła pradstaŭnica ministra zamiežnych spraŭ Litvy Paŭlina Levickicie, piša Delfi.lt.
Jak patłumačyŭ ministr kultury Simonas Kajrys, hetaja žančyna — hramadzianka Ukrainy i ciapier žyvie ŭ Łatvii, tamu, u adroźnieńnie ad vykanaŭcaŭ z Rasii, joj nie zabaronieny ŭjezd u krainu aŭtamatyčna.
«Pakolki havorka idzie pra arhanizatara pryvatnych mierapryjemstvaŭ na pryvatnych prastorach, adzinaje vyjście — razhledzieć, ci nie dadać takoha čałavieka ŭ śpis niepažadanych asob u Litvie», — skazaŭ ministr.
Śviatłana Łabada dałučyłasia, takim čynam, da inšych vykanaŭcaŭ z Rasii, jakija byli aficyjna pryznanyja piersonami non-hrata ŭ Litvie. U hety śpis uvachodziać, naprykład, takija «pieśniary impieryi», jak Aleh Hazmanaŭ, Filip Kirkoraŭ, Hryhoryj Leps, Nataša Karalova, Chabib (Chabib Šarypaŭ). Jany byli ŭniesienyja ŭ čorny śpis jašče da pačatku šyrokamaštabnaj vajny va Ukrainie za svaju publičnuju padtrymku pucinskaj palityki i naviedvańnie anieksavanaha Kryma.
Śviatłana Łabada, adna z samych papularnych u Rasii śpiavačak apošnich hadoŭ, zapłanavała ŭ Litvie čatyry kancerty na kaniec listapada — pačatak śniežnia: u Paniaviežysie, Šaŭlai, Kłajpiedzie i Vilni.
Jak paviedamlaje kanał LRT, śpiavačka viała aktyŭnuju kancertnuju dziejnaść u Rasii paśla akupacyi Rasijaj Kryma, a ŭ 2015 hodzie taksama śpiavała 9 maja na mierapryjemstvie, pryśviečanym pieramozie Savieckaha Sajuza ŭ Druhoj suśvietnaj vajnie.
Pavodle infarmacyi LRT, paśla pačatku intensiŭnych bajavych dziejańniaŭ sioleta ŭ lutym śpiavačka źjechała na zachad, chacieła vystupić na dabračynnym mierapryjemstvie ŭ Łatvii, pryśviečanym padtrymcy Ukrainy, ale arhanizatary joj nie dazvolili.
Litoŭskija ž čynoŭniki kirujucca ŭ svaim rašenn tym, što raniejšaja pazicyja Łabady ŭ dačynieńni da Rasii vyklikaje niedavier. Uvohule ž Simonas Kajrys zaklikaŭ pradstaŭnikoŭ kancertnaha biznesu ŭ Litvie samim prajaŭlać bolš razborlivaści i nie zaprašać u krainu sumnieŭnych vykanaŭcaŭ, jak heta ŭžo robiać u Łatvii. «Arhanizatary pryvatnych mierapryjemstvaŭ pavinny viedać, što jany ryzykujuć: takaja asoba, jakaja ŭjaŭlaje peŭnyja ryzyki, moža ŭ luby momant trapić u śpis — užo jość i takaja sudovaja praktyka. I tady jany taksama ryzykujuć svaimi inviestycyjami, mierapryjemstvam, a dziaržava budzie nie na ich baku», — skazaŭ Kajrys.
Kamientary