Brytanski instytut kiniematahrafii nazvaŭ najlepšy film usich časoŭ
Brytanski instytut kiniematahrafii (BFI) nazvaŭ najlepšy film usich časoŭ. Heta stužka bielhijskaj režysiorki Šantal Akierman «Žana Dzilman, nabiarežnaja Kamiercyi 23, Brusiel 1080». Upieršyniu ŭ dziasiatku najlepšych filmaŭ rejtynha trapiła stužka, jakuju źniała žančyna.
Apytańnie, jakoje ładziać kožnaje dziesiacihodździe, krytykavali za niedachop raznastajnaści. Pieramožnaje miesca na praciahu 40 hadoŭ utrymlivaŭ «Hramadzianin Kiejn» Orsana Uełsa. Tolki ŭ 2012 hodzie jaho abahnaŭ film Alfreda Chičkoka «Hałavakružeńnie».
Stužka «Žanna Dzilman», vypuščanaja ŭ 1975 hodzie, raskazvaje historyju bielhijskaj udavy, jakaja stanovicca seks-rabotnicaj, kab źvieści kancy z kancami, ale zabivaje adnaho sa svaich klijentaŭ. Film doŭžycca amal try z pałovaj hadziny.
Choć stužka Akierman nie tak viadomaja za miežami śvietu kinakrytyki, jak papiarednija pieramožcy, jaje pryznali «šedeŭram» i navatarskim fieminisckim tvoram.
Kinakrytyk i piśmieńnica Lilijan Kroŭfard, jakaja ŭdzielničała ŭ apytańni, skazała, što film źjaŭlajecca «prahramnym tekstam» fieminisckaha kino.
Šantal Akierman pamierła ŭ 2015 hodzie va ŭzroście 65 hadoŭ.
Apytańnie pravodzicca časopisam Brytanskaha kinainstytuta Sight and Sound štohod z 1952 hoda. U minułym jaho krytykavali za adsutnaść raznastajnaści ŭ apytańni ekśpiertaŭ i ŭ rejtynhu 100 najlepšych filmaŭ. Z hadami BFI pavialičyŭ kolkaść i raznastajnaść kansultantaŭ, jakija składajuć rejtynh.
Sioleta 1639 krytykaŭ, dyrektaraŭ prahram fiestyvalaŭ, kurataraŭ, supracoŭnikaŭ archivaŭ i navukoŭcaŭ paprasili vybrać dziasiatku najlepšych stužak. Pieramožca minułaha hoda, stužka «Hałavakružeńnie» Chičkoka, zaniała druhoje miesca, pasunuŭšy «Hramadzianina Kiejna» na treciaje. Na čaćviortym miescy apynułasia «Takijskaja historyja» Jasudzira Ozu, a na piatym — «Luboŭny nastroj» Vonha Karvaja.
Kamientary