Letaś fizasoby impartavali ŭ 2,4 raza bolš mašyn, čym hod tamu. Jakija aŭto čaściej vieźli ź Jeŭropy i ZŠA?
Minuły hod staŭ adnym z najhoršych u historyi dla aficyjnych imparcioraŭ aŭto ŭ Biełarusi. Za hod prodaž u ich abrynuŭsia ŭ 2,7 raza i skłaŭ usiaho 17,2 tysiačy aŭto suprać 46,8 tysiačy hodam raniej. Na hetym fonie impart mašyn ź Jeŭropy i ZŠA fizičnymi asobami, naadvarot, vyras, pryčym u 2,4 raza.
Pik pryjšoŭsia na kastryčnik
Pa vynikach 2022 hoda, z ulikam niapoŭnych danych za śniežań, biełaruskija fizičnyja asoby zavieźli ŭ krainu bolš za 80 000 transpartnych srodkaŭ z-za miežaŭ JEAES. Takija ličby pryvodzić servis «Antyskrutka» sa spasyłkaj na danyja Fiederalnaj mytnaj słužby. U 2021 hodzie fizičnymi asobami było impartavana kala 35 tysiač aŭtamabilaŭ z trecich krain.
U pieryjad sa studzienia pa žnivień u Biełaruś fizasobami štomiesiac uvoziłasia pa 3—5 tysiač aŭto. U vieraśni adbyŭsia rezki skačok: tady za miesiac zavieźli bolš za 11 tysiač aŭto. Pik pryhonu pryjšoŭsia na kastryčnik, kali ŭ Biełaruś zavieźli amal 14 tysiač aŭto. U listapadzie — bolš za 13,5 tysiačy. Za niapoŭny śniežań — 8 748.
Adčuvalny pryrost popytu na pryhon aŭto z-za miažy vyklikali rost cen na novyja aŭto i ich deficyt jak u Biełarusi, tak i ŭ RF. Pradaŭcy śćviardžajuć, što značnaja častka pryviezienych u Biełaruś mašyn u vyniku apynułasia na rasijskim rynku. Pavyšany popyt z boku rasijan paŭpłyvaŭ i na asartymient mašyn, jakija vieźli da nas.
Samaj papularnaj markaj aŭtamabila dla impartu z-za miažy ŭ 2022 hodzie stała BMW. Aŭtamabili hetaj marki skłali kala 17,57% ad ahulnaj kolkaści ŭviezienych aŭto. Na druhim miescy idzie VW, na pryhon «narodnych aŭtamabilaŭ» prypadaje 10,53 %. Zamykaje trojku lidaraŭ Renault z 7,08% rynku. Dalej u rejtynhu raźmiaścilisia Audi i Ford, u ich 6,41 i 6,26% adpaviedna.
Top-5 madelaŭ, jakija pryhaniajucca čaściej za ŭsio, vyhladaŭ nastupnym čynam:
— BMW X3 — 3,12%
— BMW X5 — 3,1%
— Volkswagen Passat — 2,79%
— BMW 5-sieryi — 2,58%
— Renault Megane — 2,47%
U 2021 hodzie top marak vyhladaŭ nastupnym čynam: Renault, Ford, BMW, Tesla, VW.
Siarod madelaŭ, jakija mohuć być impartavanyja tolki z ZŠA, najbolš zapatrabavanymi ŭ 2022 hodzie akazalisia: Chevrolet Equinox, VW Jetta i Ford Escape.
Da rekordaŭ usio jašče daloka
Niahledziačy na bolš čym dvuchrazovy pryrost, da papiarednich rekordaŭ pa ŭvozie inšamarak jašče daloka.
Najbolšuju kolkaść aŭto fizičnyja asoby impartavali ŭ Biełaruś u 2011 hodzie. Adbyvałasia heta pierad uźniaćciem pošlin da rasijskaha ŭzroŭniu. Pry tym, što staryja taryfy ŭ 2011 hodzie dziejničali ŭsiaho 6 miesiacaŭ, fizasoby paśpieli zavieźci ŭ Biełaruś bolš za 250 tysiač aŭto z trecich krain.
Za nie mienš napružany 2010 hod fizasoby zavieźli ŭ Biełaruś 192 tysiačy aŭtamabilaŭ ź Jeŭropy i ZŠA.
«Naša Niva» — bastyjon biełaruščyny
PADTRYMAĆ
Kamientary