99% ​​rasijskich fejkavych akaŭntaŭ sacsietki pakidajuć niekranutymi — sakretnyja dakumienty ZŠA

Zhodna sa źlitym dakumientam ZŠA, ekskluziŭna pradstaŭlenym vydańniem The Washington Post, suśvietnyja sacyjalnyja sietki i pošukavyja sistemy nie vyjaŭlajuć abo pakidajuć niekranutymi 99% fejkavych akaŭntaŭ, jakija raspaŭsiudžvajuć rasijskuju prapahandu ŭ internecie. 

U dakumiencie paviedamlajecca, što Kreml staŭ bolš paśpiachovym u manipulacyi infarmacyjaj i raspaŭsiudžvańni chłuśni (naprykład, pra vajnu suprać Ukrainy), vykarystoŭvajučy sotni tysiač fejkavych akaŭntaŭ u internecie. Taksama adznačajecca rezkaje ŭzmacnieńnie rasijskaj prapahandy na takich płatformach jak Telegram, Twitter, YouTube i TikTok.

Aproč hetaha, vyśvietliłasia, što amierykanskaja vyviedka maje dostup da ŭnutrysłužbovaj dakumientacyi «HłavNIVC UDP RF» (Hałoŭny navukova-daśledčy vyličalny centr Kiravańnia spravami Prezidenta RF, ci prosta HałoŭNDVC) — paŭsakretnaj i vielmi ŭpłyvovaj rasijskaj dziaržaŭnaj arhanizacyi pa nahladzie za kibierprastoraj i telekamunikacyjnymi sistemami Rasii i zamiežža.

Śpiecsłužby ZŠA taksama mahli prasłuchoŭvać supracoŭnikaŭ HałoŭNDVC, i mienavita adtul Pientahon pierachapiŭ słužbovuju spravazdaču, u jakoj havaryłasia ab nibyta praktyčnaj niemahčymaści adsočvańnia rasijskich fejkaŭ u internecie. 

Nieviadoma, ci źjaŭlajucca takija śćviardžeńni praŭdzivymi, adnak niekatoryja ekśpierty pa hetym pytańni adznačyli vydańniu, što padobnaje vyklikaje ŭ ich tryvohu. Ź inšaha boku, pośpiechi rasijskaj prapahandy mohuć być i pierabolšanyja.

Što jašče raskryvaje dakumient?

Źlity dakumient raskryvaje padrabiaznaści ab kampanii dezinfarmacyi i prapahandy, jakuju pravodzić HałoŭNDVC pry dapamozie «sotniaŭ tysiač fejkavych botaŭ sietki Fabrika (hetaj nazvaj amierykanskaja vyviedka paznačaje skandalna viadomuju rasijskuju «Fabryku trolaŭ» Jaŭhiena Pryhožyna — zasnavalnika hrupoŭki «Vahnier»).

U spravazdačy skazana, što HałoŭNDVC u kancy 2022 hoda zaniaŭsia ŭdaskanaleńniem mahčymaściej «Fabryki trolaŭ» dla «pavieličeńnia kantrolu Maskvy nad chatnim infarmacyjnym asiarodździem i ŭzmacnieńnia prasoŭvańnia rasijskaj prapahandy za miažoj».

Heta, pa infarmacyi ZŠA, taksama maje na mecie ŭniasieńnie razładu pamiž krainami Zachadu i «demaralizacyju ŭkraincaŭ». 

«Boty prahladajuć publikacyi ŭ sacsietkach, staviać łajki, padpisvajucca i repościać prapahandyscki i fejkavy kantent, a taksama manipulujuć kolkaściu prahladaŭ, kab pieramiaścić hety kantent uvierch pa vynikach pošuku, rejtynhu i śpisach rekamiendacyj. U toj ža čas Fabrika zajmajecca masavym spamam prapahandy i fišynhavych spasyłak na numary i elektronnyja pošty zvyčajnych karystalnikaŭ», — havorycca ŭ dakumiencie.

Aproč hetaha, The Washington Post pryvodzić infarmacyju i ź inšaha,bolš zasakrečanaha dakumienta, fatahrafiju jakoha nie vystaŭlała na pakaz.

U im raskazvajecca ab dziejnaści novaj rasijskaj sakretnaj arhanizacyi — Centra śpiecyjalnych apieracyj u kibierprastory — jakaja pieravažna zajmajecca Ukrainaj. Śpiecsłužby ZŠA zmahli daviedacca ab metach i zapłanavanych apieracyjach hetaj arhanizacyi na ŭvieś 2023 hod.

Hetyja płany i mety na 2023 hod składajucca z 6 infarmacyjna-psichałahičnych śpiecyjalnych apieracyj:

1. Raspalvańnie roznahałośsiaŭ na Zachadzie šlacham raspaŭsiudžvańnia idei ab tym, što aficyjnyja asoby ZŠA nibyta chavajuć ad sajuźnikaŭ pabočnyja efiekty svaich vakcyn.

2. Demanizacyja i abiasčałaviečvańnie ŭkrainskaha pałka «Azoŭ» dla padtrymańnia prapahandysckaha vobraza pałka i Ukrainy jak «strašnaha voraha» dla rasijskich hramadzian.

3. Usialeńnie strachu va ŭkrainskich biežancaŭ u Polščy, Litvie i Łatvii šlacham raspaŭsiudžvańnia fejkavaha naratyvu ab žadańni ŭładaŭ hetych krain adpravić ukraincaŭ nazad vajavać suprać Rasii.

4. Infarmavańnie mižnarodnaj hramadskaści ab tym, što Ukraina nibyta viarbuje supracoŭnikaŭ AAN dla špijanažu ŭ svaich metach.

5. Raspaŭsiudžvańnie iłžyvych źviestak ab praviadzieńni Ukrainaj i NATA sumiesnych śpiecyjalnych apieracyj upłyvu suprać Jeŭropy.

6. Raskryćcio asob ukrainskich vajskoŭcaŭ i hramadzianskich aktyvistaŭ, jakija zajmajucca praviadzieńniem infarmacyjnych napadaŭ na Rasiju.

Nahadajem, što z pryčyny ŭciečak amierykanskich sakretnych dakumientaŭ taksama stali viadomyja realnyja straty rasijskaj armii, u tym liku i kolkaść zahinułych bajcoŭ rasijskaha elitnaha śpiecnaza HRU.

Sam vinoŭnik hetych źlivaŭ byŭ niadaŭna znojdzieny i aryštavany ŭładami ZŠA. Jamu pahražaje da 15 hadoŭ pazbaŭleńnia voli.

Čytajcie taksama: 

Śmierć Pucina, śmierć Zialenskaha, «udar pa Kramli». Raźviedka ZŠA razhladaje «nievierahodnyja» scenary vajny — źlivy

U źlitych sakretnych dakumientach ZŠA tłumačycca dyviersija ŭ Mačuliščach

Što takoje Discord — płatforma, na jakoj byli apublikavanyja sakretnyja amierykanskijadakumienty, i jak joj karystacca

• 0
• 0
• 1
• 1
• 1
• 1
• 4
• 0