Biełarusam pad mižnarodnaj abaronaj u Polščy stanie praściej zrabić zaprašeńni na vizu dla svajakoŭ
MZS Polščy paćvierdziła, što biełarusam, jakija znachodziacca pad mižnarodnaj abaronaj, dastatkova nataryjalnaha zaprašeńnia na vizu dla rodnych.
Pavodle ahulnaha praviła, zaprašeńni dla afarmleńnia vizy svajakam u Polšču afarmlajucca praz vajavodstva. Takija zaprašeńni mohuć rabić hramadzianie Polščy, uładalniki pastajannaha dazvołu na žycharstva abo asoby z časovym dazvołam na žycharstva (DNŽ), jakija pražyvajuć u Polščy minimum piać hadoŭ.
Dla biełarusaŭ, u jakich niama PMŽ i jakija znachodziacca ŭ Polščy mienš za piać hadoŭ, takaja mahčymaść adsutničaje. Adnak Ministerstva zamiežnych spraŭ Polščy hatova zrabić vyklučeńnie dla tych hramadzian Biełarusi, jakija znachodziacca ŭ Polščy pad mižnarodnaj abaronaj.
Błok Prakopjeva-Jahorava ŭ Kaardynacyjnaj radzie apublikavaŭ aficyjny adkaz konsulskaha departamienta MZS Polščy.
U dakumiencie havorycca, što biełarusy, jakija majuć mižnarodnuju abaronu, mohuć afarmlać zaprašeńni dla svajakoŭ, zavieranyja nataryusam. Pry hetym zajaŭnik pry padačy na vizu pavinien pradstavić dokazy rodnasnych suviaziaŭ z tym, kaho zaprašaje na vizu, a taksama kopiju dazvołu na žycharstva i dakumient, jaki paćviardžaje status asoby, jakaja znachodzicca ŭ Polščy.
Z-za kadravych abmiežavańniaŭ u konsulskich orhanach Polščy ŭ Biełarusi, MZS raić zahadzia ŭzhadniać padaču takich dakumientaŭ.
Akramia taho, błok viadzie pieramovy pra mahčymaść padačy na vizu pa nataryjalnych zaprašeńniach napramuju praz konsulstvy, biez zvarotu ŭ vizavyja centry. Heta važna dla abarony piersanalnych danych tych, chto znachodzicca ŭ Polščy pad mižnarodnaj abaronaj.
-
Polskaja daślednica biełaruskaj identyčnaści maryć pra pomnik «kułaku» ŭ Minsku i čakaje, kali Biełaruś znoŭ adkryjecca śvietu
-
Biełarus, jaki adsiadzieŭ u Tambovie, zavis miž niebam i ziamloj — Rasija choča departavać, a Biełaruś pytajecca: chto heta?
-
Mama studentki-vydatnicy raskazała pra vydatki na vypuskny
Kamientary