«Rok-karona» ŭ «Bieź Bileta», ale šou skrali Kulinkovič i Vajciuškievič

«Nie viedaju, chto tam budzie vystupać potym, ale razahravaje ich «Lapis Trubiacki», — skazaŭ adzin z rok-amataraŭ na podstupach da kłubu «Reaktar», dzie adbyvałasia «Rok-karanacyja-2009».

Sapraŭdy kancert adkryvaŭ SAM: rok-karol minułaha hodu Siarhiej Michałok, jakija sioleta prydbaŭ tolki adnu małuju karonu za najlepšuju pieśniu «Ružovyja akulary». Ale jaje Michałok nie praśpiavaŭ, zadavoliŭšysia «Ramonkami» i kavieram na pieśniu kłasikaŭ pank-roku Ramones, a taksama dekłamacyjaj vieršaŭ Majakoŭskaha i Kupały.

Uvohule na «Rok-karanacyi-2009» usie staralisia razmaŭlać pa-biełarusku. «Znaŭca» Aleś Muchin, jaki ŭručaŭ hałoŭnuju rok-karonaŭ, pad hučnym ciskam publiki na pałovie skazu pierajšoŭ na biełaruskuju.

Navat antyhieroi niadaŭniaha skandału maładyja rokiery The Toobes, jakija zajavili kolki tydniaŭ tamu, što nie razumiejuć pa-biełarusku,

usio ž, peŭna, pačali adolvać moŭnyja azy.

Paśla atrymańnia karony za «debiut hodu» i słovaŭ Aksany Viečar «Jany majuć usio, akramia viedańnia biełaruskaj movy» salist The Toobes Stas narešcie vymaviŭ: «Vielmi pryjemna». Rasijski rok pa-biełarusku vykanała pravadziejnaja rok-kniazioŭna-2009, liderka Naka Nastaśsia Špakoŭskaja. Pa-biełarusku nie havaryli tolki ŭdzielniki kalektyvu «Kniaź Myškin» (rok-karona za addanaść žanru) — jany ŭvohule nie vymavili ni słova, bo byli całkam zasiarodžanyja na svaich miedytatyŭnych uščypvańniach elektrahitarnych strun i rehulavańniach tahaśvietnaha kampjutarnaha šumavińnia, jakoje hučała ŭsio roŭna jak haradski varyjant «Trojcy». Žyvym ža papulizarataram biełmovy ŭ rokavych dyjaapazonach, muzyčnamu partału «Tuzin Hitoŭ» ź jaho albomam «Pierazahruzka» (tam rasijskamoŭnyja tvorcy pierapiajali svaje hity pa-biełarusku) navat dali «Prajekt hodu».

«Niestandartny varyjant» (jany atrymali novuju naminacyju «Rep-prajekt hoda») vykanaŭ svoj chit «U nieba» i remiks na NRM-maŭski «Pavietrany šar». Darečy, duch adsutnaha backi-NRM usio łunaj pa-nad «Rok-karanacyjaj-2009». Vyjaviłasia, što hurt na hetaj adsutnaści navat zarabiŭ: Volski i K atrymali rok-karonu za samy paśpiachovy kancert hodu: majeca na ŭvazie sapraŭdy paśpiachovy akustyčny unplugged u KZ Minsk pry kancy 2009, jaki adbyŭsia paśla doŭhaha pierapynku z poŭnym anšłaham.

Kali viadoŭca Aleh Chamienka pačaŭ sypać słovami «pačesny» i «hanarovy», «układ u raźvićcio rok-muzyki» i «spadčyna» ŭsie zrazumieli, što zaraz na scenu vyjdzie chtości ŭviešany rok-rehalijami i duža stareńki. Ale nie viedali, što nahetulki!

Na scenu vyvalili ź sivoj baradziščaj a-la ZZ-Top (prabačcie, dzied-Baradzied) Alaksandr Kulinkovič i jašče adzin salist Neurodubelja Jury Navumaŭ,

taksama ŭładalnik nakładnoj «amierykanki». Jany pa-stara-dobramu ŭsypali rokienrolnaha piercu ź imbiercam. Dziady, kažacie? Uniosak u bieł-rok, havarycie? Neurodubel znoŭ davioŭ, što chavać ich zarana.

Rytm-end-bluzavy «Krama» vyjhraŭ naminacyju «Tradycyi i sučasnaść», jakaja zazvyčaj dajecca folk-hurtam, dy atrymaŭ ad hramadskaj kampanii «Budźma biełarusami!» akarynu, staradaŭni instrumient, vidać dla rytm-end-bluzavych praktykavańniaŭ pa-starabiełarusku.

Vajciuškievič zajšoŭ z zadniaha chodu. Atrymaŭšy karonu za vykanaŭca hodu, jon nie staŭ uspaminać svaich kolišnich folk-rokavych ekśpierymientaŭ z časoŭ «Kryvi», i nahadaŭ publicy, što nie rokam adziny. I jak! Vyjšaŭšy z adnoj hitaraj i, šmatkroć spyniajučy napieŭ dziela rytaryčnych pasažaŭ, prapiajaŭ-prahavaryŭ paru novych šansonaŭ ( u charošym, francuzskim, sensie hetaha słova). Prahučała novaja pieśnia «Biełaruski mužčyna» na słovy Andreja Chadanoviča. Ci to ad praŭdy-matuchny pra biełaruskaha mužčynu, ŭ jakoha «dzied pieražyŭ industryjalizacyju, baćka pryvatyzacyju, a kot — kastracyju», ci to ad niečakanaha vyhinu rok-kancertu, publika zaskavytała ad zachapleńnia.

Vybar hurtu hodu, albomu hodu i adpaviedna ŭładalnika rok-karony hodu, peŭna, byŭ abumoŭleny zaciahnutaj zimoj.

Bo celny «Kultpraśviet» «Lapisa» i jaskravy debiutnik The Toobes — Hello!, nie sastupali pieramožcu — hurtu «Bieźbiletu» ź jahonaj «Afrykaj», ale jany byli jaŭna pazbytyja soniečnaj atmaśfiery i afrykanskaha kałarytu.

«Pakolki ŭ śviecie naša kraina viadomyja svajoj depresijaj, — tut pa try miesiacy nie byvaje sonca,— dyk my pavinny mieć toje sonca znutry» — patłumačyŭ svaju zacikaŭlenaść afrykanskimi tematykaj lider bieźbiletnikaŭ i rok-karol 2009 Vitalik Artyst.

Amal 5-hadzinny kancert zakončyłasia śpiavańniem himnam usich časoŭ i adnaho naroda «Maja kraina Biełaruś». Hety kancert — jaŭny pretendent na «rok-karonu» za najlepšy kancert užo 2010 hodu.

Pavał Kaściukievič, fota Julii Alaksandravaj, Salidarnaść

• 0
• 0
• 0
• 0
• 0
• 0
• 0
• 0