Sotni biełarusaŭ pryjšli da polskaj ambasady ŭ Minsku
Kab vykazać spačuvańnie ŭ suviazi z hibiellu pasažyraŭ samalota prezidenta Polščy pad Smalenskam.
Uviečary 10 krasavika kala ambasady Polščy ŭ Minsku, što na vulicy Rumiancava, sabralisia sotni biełarusaŭ. Jany pryjšli vykazać spačuvańnie ŭ suviazi z hibiellu pasažyraŭ samalota prezidenta Polščy pad Smalenskam. Inicyjavali hetuju akcyju internet-aktyvisty: napiaredadni ŭ biełaruskich błohach źjaviŭsia zaklik sabracca a 19-j la pasolstva z kvietkami i śviečkami.
Ludzi pačali prychodzić raniej — užo a pałovie na 19-ju kala ambasady sabrałasia kala sotni čałaviek. Siarod pieršych pryjechała hrupa moładzi na rovarach. Kala ŭvachoda ŭ pasolstva stali źjaŭlacca kvietki, płakaty sa słovami spačuvańnia, źnički.
Uskłaści kvietki pryjšli viadomyja ludzi — palityki, historyki, litaratary, artysty. «Kolki tut śviečak!» — vyhuknuła maleńkaja dziaŭčynka. Mnohija pryjšli z małymi dziećmi. Tyja chutka ścichali, adčuvajučy ahulny nastroj darosłych. Supracoŭnik ambasady adčyniŭ bramu, kab achvotnyja mahli pakinuć spačuvalny zapis u śpiecyjalnaj knizie. Adzin za zadnym, nietaropka, ludzi išli ŭ ambasadu, na druhi pavierch. Cicha kazali spačuvalnyja słovy supracoŭnikam ŭ strohich harniturach. Nie było nijakich pravierak na ŭvachodzie, u dzień žałoby nichto nie prasiŭ naviednikaŭ vyklučać telefony i pakazvać pašparty.
…Kali na Rumiancava sabraŭsia ładny natoŭp, vysoka nad hałovami ludziej z sumnym krykam pralacieŭ klin husiej.
HLADZI JAŠČE. FOTAREPARTAŽ: ŽYCHARY VARŠAVY PRYJŠLI DA PREZIDENCKAHA PAŁACU.
Ciapier čytajuć
Milicyja zatrymała taho samaha rasijskaha turysta, jaki kinuŭ niedakurak na vulicy. Zaŭtra sud29
Kamientary