Rasijanin zabiŭ znajomaha, pajechaŭ na vajnu i zavioŭ błoh. Jon kaža, što lepš vajna, čym emihracyja

16 kastryčnika 2024 hoda Alena Maŭsisian ź Sievieradźvinska zajaviła ab źniknieńni syna Emila. Jaho cieła sa śladami hvałtoŭnaj śmierci znajšli 30 kastryčnika. U chutkim časie śledstva abviaścia ŭ vyšuk znajomaha zabitaha — Jaŭhienija Bierha. Padazravanaha zatrymali ŭ Novarasijsku ŭ sakaviku 2025 hoda.

Uvieś hety čas Bierh žyŭ pa padroblenych dakumientach u roznych haradach Rasii, źmianiajučy źniešnaść. Na dopycie jon pryznaŭ vinu i zajaviŭ, što zabiŭ znajomaha z reŭnaści da byłoj žonki. Maci Emila sumniavajecca, što Bierh ździejśniŭ złačynstva ŭ adzinočku.

«U ekśpiertyzie napisana, što streł byŭ zrobleny va ŭpor i byŭ vyšej łba na 4 santymietry. U pakazańniach Bierha skazana, što Emil išoŭ jamu nasustrač, i jon streliŭ u jaho padčas chadžeńnia prosta ŭ tvar. Atrymajecca, kula nie mahła apisać duhu i trapić vyšej łba. Z hetaha vynikaje, što viersija Bierha niepraŭdapadobnaja. Tak možna było strelić, kali b Emil stajaŭ na kaleniach abo lažaŭ na ziamli. Ja dumaju, što jaho, chutčej za ŭsio, źbivali [niekalki čałaviek], a potym zastrelili. U jaho byŭ vybity zub, na šyi była viaroŭka i pakiet», — raskazała Alena.

U lipieni Sievieradźvinski haradski sud prypyniŭ vytvorčaść pa spravie Bierha, pravioŭšy ŭsiaho adno pasiadžeńnie. Stała viadoma, što abvinavačany zaklučyŭ kantrakt ź Min­abarony Rasii i pajechaŭ na vajnu. U adkaz Alena Maŭsisian pada­ła apielacyju. Maci zabitaha ličyć, što ŭ śledstvie nad Bierham byli dapuščany parušeńni.

«Pa-pieršaje, mianie pierad sudom nie paviedamili ab źmienie sudździ. Na hetaj padstavie ja mahu asprečyć rašeńnie [novaha] sudździ. Ale ja hutaryła z pustatoj. Pa-druhoje, nie było pasiadžeńnia, sudździa sam pryniaŭ rašeńnie ab zadavalnieńni chadajnictva [ab adpraŭcy Bierha na vajnu]. Napiaredadni sudździa vyjšaŭ z adpačynku, jon nie moh paśpieć da 8 lipienia aznajomicca z 7 tamami spravy. Pa-treciaje, parušanyja maje hramadzianskija pravy, ja nie pačuła prysud pra toje, što Bierh pryznany zabojcam», — zajaviła maci pamierłaha.

Sam abvinavačany zavioŭ telehram-kanał «Śpidran SVA», dzie raskazvaje pra svaju słužbu. 25 žniŭnia Bierh vykłaŭ rolik i zajaviŭ, što daŭno źbiraŭsia pajechać na vajnu. Pavodle jaho słoŭ, tam jon «adčuvaje siabie našmat lepš, čym znachodziačysia ŭ vyšuku abo ŭ turmie».

«Ja jašče ŭ listapadzie—śniežni pryniaŭ rašeńnie jechać na SVA, a nie za miažu pa novym pašparcie. Tamu što ja chaču zastacca na Radzimie i nikoli nie chacieŭ kudyści pierajazdžać i emihravać. Tamu nie skažu, što dla mianie ŭsio heta niejkim čynam šakujuča abo niečakana. Amal hod tamu jašče ja pryniaŭ hetaje rašeńnie, i voś ja ź im ciapier žyvu. Tamu ja nie asabliva zasmuciŭsia, kali mianie złavili. Bo ja i źbiraŭsia jechać na vajnu, i voś ja tut», — skazaŭ Bierh.

• 0
• 0
• 0
• 7
• 0
• 0
• 4
• 0