U Rasii pačali pradavać biełaruskija płanšety, padazrona padobnyja da kitajskich
U Rasii pačali pradavać biełaruskija płanšety. Adnak pra heta paviedamili nie ŭ chołdynhu «Haryzont», jaki i vypuściŭ navinku na rynak, a ŭ sietcy kram «M. Videa», zaŭvažyła «Salidarnaść».
Kupić možna adnu z čatyroch madelaŭ: bazavuju H-Tab 1 za 15 999 rasijskich rubloŭ (kala 575 biełaruskich), H-Tab 1+ z palepšanaj vyjavaj i vialikim abjomam pamiaci — ad 17 599 rubloŭ (645 biełaruskich). Fłahman H-Tab 1 Pro, «raźličany na šmatzadačnyja scenaryi» — ad 23 699 rubloŭ (870 biełaruskich) i H-Tab 1 Shield, udaraŭstojlivy, pryznačany dla praciahłaj aŭtanomnaj pracy — 33 899 rubloŭ (krychu bolš za 1 240 biełaruskich).
Padkreślivajecca, što start prodažaŭ «staŭ praciaham raźvićcia supracoŭnictva ź biełaruskimi vytvorcami, jakoje realizujecca ŭ ramkach Miemaranduma ab stratehičnym supracoŭnictvie», padpisanaha ŭ mai 2025 hoda pry padtrymcy Alaksandra Łukašenki i ŭradaŭ Biełarusi i Rasii.
Akramia taho, z 20 śniežnia płanšety ad «Haryzonta» pradajucca i ŭ biełaruskich anłajn-kramach — mała taho, što biez rekłamnaj kampanii, dyk jašče i adrazu sa źnižkami ŭ 20%.
I kali pryhledziecca da madelaŭ bolš uvažliva, možna zdahadacca, čamu tak. H-Tab 1 Shield, «aryjentavany na vykarystańnie ŭ pajezdkach abo palavych umovach», vonkava i pa techničnych charaktarystykach — poŭnaja kopija kitajskaha płanšeta Hotwav R7.
Astatnija «biełaruskija» płanšety padazrona padobnyja pa dyzajnie na Folg Tab 11, ale niezrazumieła čyjoj vytvorčaści (navat na sajcie vytvorcy kraina pachodžańnia hadžeta nie paznačanaja). A bazavaja madel H-Tab 1 pa dyzajnie nahadvaje hibryd TechLife Pad Neo i Huawei MatePad Pro.
Pra zapusk vytvorčaści biełaruskich płanšetaŭ «Haryzont» abviaściŭ letam hetaha hoda. Na 2026 hod u płanach pradpryjemstva — padvoić vytvorčaść i vypuścić bolš za 4 miljony adzinak techniki, uklučajučy drobnuju i bujnuju bytavuju.
Ciapier čytajuć
«Biada, na vialiki žal, užo stupaje na paroh Siniavokaj». Ultymatum Zialenskaha Łukašenku: što budzie dalej?71
Kamientary