Biełaruś vyvieła na arbitu dva novyja spadarožniki: što pra ich viadoma
Z kasmadroma «Uschodni» paśpiachova zapuščany dva biełaruskija kaśmičnyja aparaty — NANBSat-1 i NANBSat-2. Pavodle NAN Biełarusi, suviaź z aparatami ŭstojlivaja, usie sistemy pracujuć štatna.
Pra dva biełaruskija spadarožniki, jakija vyviedzieny na arbitu z kasmadroma Uschodni, raskazali ŭ Nacyjanalnaj akademii navuk.
Hetyja kaśmičnyja aparaty — biełaruskija raspracoŭki pa dziaržaŭnaj prahramie «Navukajomistyja technałohii i technika».
Praz hadzinu paśla startu spadarožniki adździalilisia ad razhonnaha błoka i vyjšli na nizkuju kalaziamnuju arbitu na vyšyni amal 500 km. Delehacyja Nacyjanalnaj akademii navuk zapusk nazirała na kasmadromie.
«Z aparatami ŭstalavana ŭstojlivaja suviaź, atrymana telemietryja. Aparaty ŭ rabočym stanie, anteny i soniečnyja batarei raskryty. Bartavyja sistemy pracujuć štatna. Suviaź ustojlivaja. Ciapier aparaty ŭziaty na kiravańnie», — raskazaŭ namieśnik načalnika ŭpraŭleńnia aerakaśmičnaj dziejnaści NAN Ivan Buča.
Termin raboty aparataŭ nie mienšy za 5 hadoŭ. Technałohii dazvolać pravodzić stereamietryčnuju i abjomnuju zdymku pavierchni Ziamli. Danyja buduć vykarystoŭvacca dla stvareńnia bazy 3D-vyjaŭ płaniety i manitorynhu nadzvyčajnych situacyj.
«Na adnym z aparataŭ, NANBSat-1, ustanoŭlena aparatura dla zandziravańnia ionaśfiery. Kab zabiaśpiečyć žyvučaść aparata nie mienš za piać hadoŭ, tam praktyčna ŭsie sistemy zadubliravany. U nas užo jość vopyt reziervavańnia žyćciova važnych sistem na našym biełaruskim aparacie, jaki pry harantyjnym terminie 5 hadoŭ adpracavaŭ bolš za 12 hadoŭ», — raskazaŭ dyrektar pradpryjemstva «Hieainfarmacyjnyja sistemy» Nacyjanalnaj akademii navuk Siarhiej Załatoj.
NANBSat-2 — bolš składany aparat z tryma kamierami (bačnaha i infračyrvonaha dyjapazonaŭ). Jon pryznačany dla stvareńnia 3D-madelaŭ płaniety i ionaśfiery. Takaja infarmacyja nieabchodna dla manitorynhu nadzvyčajnych situacyj, a taksama dla pracy Biełaruskaj AES i čyhunki.
Kamientary