Džej Dzi Vens vydaliŭ tvit pra hienacyd armianaŭ pierad vizitam u Azierbajdžan
Vice-prezident ZŠA Džej Dzi Vens padčas vizitu ŭ Armieniju naviedaŭ miemaryjał achviar hienacydu armianaŭ 1915 hoda.
Zatym jon nakiravaŭsia ŭ varožy Armienii Azierbajdžan, a pa darozie vydaliŭ tvita pra vizit u Armieniju, piša Bild.
Miemaryjał Cicernakabierd uźviedzieny ŭ pamiać kala 1,5 miljonaŭ armianaŭ, jakich u 1915—1916 hadach vojski Asmanskaj impieryi zabili abo departavali ŭ pustyniu, dzie ludzi pamirali ad hoładu. Adnak Turcyja — dziaržava-spadkajemca Asmanskaj impieryi — da hetaha času admaŭlaje hienacyd, jak i sajuzny joj dyktatar Azierbajdžana. Prezident Turcyi Radžep Tajip Erdahan kaža maksimum pra niejkija «ciažkija abstaviny Pieršaj suśvietnaj vajny», achviarami jakich stali armianie.
Paśla naviedvańnia miemaryjała ŭ akaŭncie Vensa ŭ Ch źjaviłasia videa jaho vizitu z tekstam: «Siońnia vice-prezident Vens i druhaja łedzi Uša Vens pryniali ŭdzieł u cyrymonii ŭskładańnia vianka da Miemaryjału hienacydu armianaŭ, kab ušanavać pamiać achviar hienacydu 1915 hoda».
Troški bolš čym praz hadzinu (pieralot ź Jerevana ŭ Baku doŭžyŭsia 74 chviliny) tvit vydalili. U adkaz na svoj zapyt ab pryčynach hetaha dziejańnia CNN atrymaŭ adkaz: tvit pamyłkova raźmiaściŭ supracoŭnik, jaki nie ŭvachodziŭ u skład delehacyi pajezdki.
Za hetym pajšli vinšavańni, apładysmienty i fota z prezidentam Ilchamam Alijevym u Azierbajdžanie. Tam Vens padpisaŭ pahadnieńnie ab «stratehičnym partniorstvie».
ZŠA pryznali hienacyd armianaŭ mienavita jak hienacyd tolki ŭ 2021 hodzie pry prezidencie Džo Bajdenie. Adnak administracyja Trampa razhladała Turcyju jak važnaha partniora i znoŭ admaŭlała nazyvać padziei 1915 hoda tym, čym jany byli.
Ciapier čytajuć
U 2021 hodzie vypusknica admoviłasia pacisnuć ruku Hihinu na ŭručeńni dypłoma. Ciapier BDU nie choča jaho paćviardžać19
Kamientary