Synam Čyža Litva dała hramadzianstva. Ale jany paśla sami jaho adraklisia
Jak stała viadoma z rasśledavańnia «Biuro» i centra Siena, Siarhiej i Uładzimir Čyžy — syny niekali adnaho z samych upłyvovych biznesoŭcaŭ Biełarusi Juryja Čyža — z 2013 hoda źjaŭlalisia hramadzianami Litvy. Pašparty krainy ES jany atrymali na padstavie litoŭskich karanioŭ.
U synoŭ Juryja Čyža bolš za dziesiać hadoŭ było litoŭskaje hramadzianstva. Jany atrymali pašparty jeŭrapiejskaj krainy, kali ichny baćka, niekali ŭpłyvovy biełaruski biznesoviec, znachodziŭsia pad sankcyjami ES.
Jak vyśvietliła «Biuro» ŭ partniorstvie z rasśledavalnickim centram Siena, Siarhiej i Uładzimir Čyžy mieli litoŭskaje hramadzianstva, ale jany admovilisia ad jaho. Heta vynikaje z rašeńnia v. a. ministra ŭnutranych spraŭ Litvy, apublikavanaha ŭ vieraśni minułaha hoda.
Syny Juryja Čyža atrymali litoŭskaje hramadzianstva viasnoj 2013 hoda dziakujučy svajakam.
Jak vynikaje z adkazu Departamienta pa mihracyi MUS Litvy, babula Čyžoŭ była litoŭskaj hramadziankaj da savieckaj akupacyi. Maci Śviatłana Čyž naradziłasia ŭ Litvie ŭžo padčas akupacyi.
Uładzimir Čyž nie zachacieŭ kazać pa telefonie, čamu jon admoviŭsia ad litoŭskaha hramadzianstva. Siarhiej Čyž nie adkazaŭ na paviedamleńni i telefanavańni žurnalista «Biuro».
Uładzimir Čyž i Siarhiej Čyž atrymali litoŭskaje hramadzianstva, kali ichny baćka Juryj Čyž znachodziŭsia pad sankcyjami ES jak «kašalok» Alaksandra Łukašenki. U sakaviku 2012 hoda ŭpłyvovy biznesoviec i jahonyja aktyvy padpali pad abmiežavańni, jakija anulavali tolki ŭ kastryčniku 2015 hoda.
Pierad vydačaj hramadzianstva Čyžoŭ praviaraŭ Departamient dziaržaŭnaj biaśpieki, kiraŭnikom jakoha ŭ toj čas byŭ Hiedyminas Hryna.
«Zusim nie pamiataju hetaj historyi. Kali ŭ DDB nie było čaho napisać [pra Čyžoŭ], to ničoha i nie napisali», — paviedamiŭ Siena były kiraŭnik DDB.
U Departamiencie pa mihracyi ŭdakładnili: pry razhladzie prašeńnia Čyžoŭ ab hramadzianstvie litoŭskija ŭłady aceńvali, ci ŭčyniali jany mižnarodnyja złačynstvy (hienacyd, vajennyja złačynstvy) i złačynstvy suprać Litvy.
«U toj čas nie było atrymana nijakaj infarmacyi, jakaja nie dazvalała b adnavić hramadzianstva Litoŭskaj Respubliki zhadanym asobam», — zaznačyli ŭ Departamiencie pa mihracyi MUS Litvy.
U minułym hodzie kala šaścisot biełarusaŭ byli pryznanyja pahrozaj nacyjanalnaj biaśpiecy Litvy. Mnohim ź ich nie vydali vid na žycharstva abo nie praciahnuli jaho. Jak tłumačyŭ DDB Litvy vydańniu «Lusterka», padstavaj dla pryznańnia pahrozaj nacyjanalnaj biaśpiecy źjaŭlajecca lubaja praca na dziaržavu, tamu što heta znak łajalnaści režymu Łukašenki.
Ciapier čytajuć
Staŭ viadomy prysud eks-pamočniku Łukašenki Iharu Bryło4
Kamientary
Haŭniuki