Hamialčan napałochali rasijskija «Šachiedy»: kružyli tak nizka, što «pałkami možna było źbivać»

Z ranicy 26 lutaha na praciahu niekalkich hadzin nad Homielem kružyŭ minimum adzin rasijski bieśpiłotny latalny aparat typu «Šachied», daviedaŭsia Fłahštok. Jaho vydavaŭ čorny koler i charakterny huk «jak u mapieda». Mahčyma, bieśpiłotnikaŭ było niekalki.

Aficyjna ab pahrozie ni ŭłady, ni siłavyja orhany ničoha nie paviedamili. Bolš za toje, mienavita na 26 lutaha ŭ Homieli była zapłanavana štomiesiačnaja płanavaja pravierka sistemy apaviaščeńnia z uklučeńniem elektrasiren. Ale ŭ momant pralotu BpŁA — realnaj pahrozy — sireny maŭčali.

Na zdareńnie adreahavaŭ tolki nieaficyjny Telehram-kanał ideołahaŭ Homielskaha abłvykankama: apublikavaŭ papiaredžańnie «prosta, kab viedać» ab mierach biaśpieki pry vyjaŭleńni dronaŭ i prystrašyŭ kryminalnym pieraśledam i pazbaŭleńniem voli na niekalki hadoŭ za «lubuju zdymku i publikacyju fota ci videa».

Ale ludzi ŭsio roŭna aktyŭna pakidali paviedamleńni ŭ sacsietkach i miesiendžarach.

Charakterna, što ŭkrainskija manitorynhavyja kanały ŭ tuju ranicu i napiaredadni nie paviedamlali ab zalocie rasijskich dronaŭ z terytoryi Ukrainy. Jość vierahodnaść, što ŭvarvańnie adbyłosia naŭprost z Rasii.

Vizualnyja nazirańni za BpŁA, jaki źjaviŭsia prykładna ŭ 07:30, pakazali, što, vierahodna, nad Homielem kružyŭ rasijski Shahed-136 (Hierań). Bajavaja častka takich dronaŭ składaje kala 50 kiłahram vybuchoŭki.

Mahčyma, što dron byŭ nie adzin. Homielcy paviedamlali ab sieryi pralotaŭ.

Dakładna viadoma, što «Šachied» bačyli i čuli nie raz u Centralnym, Čyhunačnym, Savieckim rajonach, a kankretna nad niekalkimi mikrarajonami: Sielmašaŭski, Zachodni, Šviedskaja Horka, Stary Aeradrom, Mielnikaŭ Łuh, taksama ŭ Kaściukoŭcy i Pakalubičach.

Niekatoryja śćviardžali, što drony lotali «čarhoj» i ździŭlalisia: 

• «Čamu sireny maŭčać?»
• «Čamu naohuł usie maŭčać?»
• «Adzin dron, padobny na Hierań, pralacieŭ a 8.54 nad vuł B. Carykava, z boku centra ŭ bok Milčy. Druhi byŭ čutny prykładna praz 10 chvilin, ale bačna jaho nie było. Treci byŭ čutny na vulicy Kirava, u rajonie Rembyttechniki kala 9.30».

Pa słovach vidavočcaŭ, praloty BpŁA byli takimi nizkimi, što «z dachu pałkami možna było źbivać». Šerah karystalnikaŭ śćviardžaŭ, što bačyli ad 5 da 10 pralotaŭ.

Nieŭzabavie za šalonym dronam (ci dronami) vajskoŭcy adpravili viertalot, jaki taksama zafiksavali žychary Homiela.

Los BpŁA pakul zastajecca nieviadomym.

• 0
• 0
• 4
• 3
• 2
• 1
• 8
• 0