KDK sabraŭ skarhi ad biełarusaŭ pa pytańniach zaradki elektramabilaŭ. Što nie tak?
Za karotki čas u Kamitet dziaržaŭnaha kantrolu pastupiła bolš za 120 skarhaŭ ad hramadzian adnosna pracy stancyj zaradki elektramabilaŭ. Dla hetaha navat była admysłova adkrytaja haračaja linija, jakaja chutka sabrała vialikuju kolkaść zvarotaŭ.
Asnoŭnaja častka skarhaŭ tyčyłasia taho, što ŭ krainie niedastatkova zaradnych stancyj. Ludzi adznačali ich niedachop nie tolki ŭ nievialikich haradach i rajonnych centrach, ale i ŭ abłasnych. Asobna zhadvałasia, što prablema jość navat uzdoŭž papularnych turystyčnych maršrutaŭ, naprykład u rajonach Naračy i Brasłaŭščyny, dzie zaradnych stancyj vidavočna nie chapaje.
Jašče prykładna tracina zvarotaŭ tyčyłasia jakaści pracy ŭžo najaŭnych stancyj. Paviedamlajecca, što niekatoryja ź ich nie pracujuć praciahły čas — miesiac i navat bolš. Taksama ludzi skardzilisia na niedapracavanyja mabilnyja dadatki dla kiravańnia zaradkaj i na drenny stan terytoryj vakoł stancyj, u tym liku pytańni čyścini i ŭtrymańnia parkovak.
U toj ža čas častka hramadzian skardziłasia nie na niedachop, a, naadvarot, na praźmiernuju kolkaść zaradnych stancyj. Heta tyčycca, u pryvatnaści, mahutnych zaradnych stancyj, ustanoŭlenych u dvarach žyłych damoŭ. Miascovym žycharam nie padabajecca, što jany pryciahvajuć vialikuju kolkaść aŭtamabilaŭ, stvarajuć šum, ruch i zabrudžvańnie terytoryi.
U suviazi z hetym u kantrolnych orhanach vykazali mierkavańnie, što ŭ žyłych rajonach, mahčyma, varta ŭstaloŭvać tolki bolš pavolnyja zaradnyja stancyi, jakija nie stvarajuć intensiŭnaha ruchu i dadatkovych prablem dla žycharoŭ.
Akramia taho, skarhi pastupali i ad kampanij, jakija zajmajucca ŭstanoŭkaj zaradnych stancyj. Jany niezadavolenyja składanaj biurakratyjaj, a taksama tym, što pracesy ŭzhadnieńnia i atrymańnia dazvołaŭ nie zusim prazrystyja.
KDK paviedamiŭ, što pieranakiruje atrymanyja skarhi adkaznym viedamstvam i arhanizacyjam, pry hetym i sam abiacaje trymać hetyja pytańni na kantroli.
Ciapier čytajuć
Kab nie siadzieć u Rasii za narkotyki, małady danosčyk z Ašmianaŭ zapisaŭsia na front. Dyj zhinuŭ2
Kamientary