«Raźbilisia niepadalok ad młyna». Što kažuć miascovyja pra deltapłan, jaki raźbiŭsia ŭčora
Dniom 14 krasavika kala vioski Aziarca adbyłosia krušeńnie motadeltapłana. U vyniku zdareńnia zahinuli dva čałavieki. Motadeltapłan raźbiŭsia pobač z muziejem u Stročycach: aparat upaŭ niepadalok ad młyna, u kancy ŭźlotna-pasadačnaj pałasy. Žurnalisty Onliner pabyvali na hetym miescy i pahavaryli ź miascovymi žycharami.
Padčas palotu 45‑hadovy piłot nie spraviŭsia z kiravańniem. Na borcie znachodziłasia taksama 26‑hadovaja pasažyrka.
Vidavočcy paviedamili, što paśla naboru vyšyni motadeltapłan pačaŭ rezka źnižacca i ŭpaŭ na ziamlu. Ad atrymanych traŭmaŭ mužčyna i dziaŭčyna pamierli na miescy.
Na miescy zdareńnia pracavali śledčyja i sudmiedekśpierty. Dakładnyja abstaviny i pryčyny krušeńnia vyśviatlajucca.
«Usio, što kažuć u sacsietkach, niapraŭda»
Paźniej stała viadoma, što zahinuły piłot — instruktar aerakłuba «Avija-Miensk» Rusłan Ivanoŭ. Heta paćvierdziŭ u sacsietkach blizki siabar mužčyny, šoumien Siarhiej Łapkoŭski — u minułym jany razam hrali ŭ hurcie «Ćviet Ałoe».
— Ja viedaŭ Rusłana 24 hady. Jon byŭ daśviedčanym piłotam. Pavodle infarmacyi ad jaho brata, pry ŭźlocie deltapłan trapiŭ u niapravilny pavietrany patok, załamała kryło, i jany ŭpali.
Rusłan byŭ pryšpileny, a ŭsio, što kažuć u sacsietkach, — heta niapraŭda (niekatoryja karystalniki TikTok i Threads pisali, što piłot nibyta vypaŭ ź latalnaha aparata na ŭźlocie, a dziaŭčyna zastałasia adna).
Heta vypadkovaść, jakaja adbyłasia z-za pryrodnych abstavin, ad jakich nichto nie zastrachavany. Ja lataŭ z Rusłanam, napeŭna, čatyry razy i całkam daviaraŭ jamu svajo žyćcio, — skazaŭ Siarhiej Łapkoŭski
Letam 2025 hoda žurnalisty taksama lotali z Rusłanam u tym samym miescy, kala Aziarca.
— Heta adzinaje miesca ŭ Minsku, dzie možna palatać na motadeltapłanie ci hirapłanie. U čym roźnica? Hirapłan — heta taki nievialiki zakryty viertalot. A motadeltapłan — heta bolš pra emocyi. Jon całkam adkryty: viecier u tvar, nieba vakoł. My žartujem miž saboj, što samalot vozić cieła, a motadeltapłan — dušu, — raskazvaŭ piłot.
«Jany časta lotali tut»
Motadeltapłan Rusłana Ivanova ŭpaŭ niedaloka ad młyna muzieja narodnaj architektury i pobytu ŭ Stročycach, na terytoryi jakoha znachodzicca aerakłub. Miesca krušeńnia dobra prahladajecca z boku vioski Voŭkavičy. Pa słovach miascovych žycharoŭ, paloty na aeradromie pačalisia z prychodam ciapła.
— Jany časta lotali tut, i ŭ minułyja vychadnyja, na Vialikdzień, taksama, — raskazaŭ miascovy žychar žurnalistu. — Siońnia, naprykład, nie bačyŭ, kab chto-niebudź byŭ u niebie.
Para, dom jakoj raźmieščany na krai vioski, adznačaje, što ŭ apošnija dni ŭ niebie časta možna było bačyć deltapłany.
— Sami my nie lotali nikoli, i žadańnia asabliva nie było. Čuli, što piłot nibyta vypaŭ z kabiny, a dziaŭčyna zastałasia ŭ deltapłanie adna. Ciapier, napeŭna, paśla takoha naohuł hetyja paloty zabaroniać, — paŭtarajuć miascovyja infarmacyju, jakaja zaraz raspaŭsiudžvajecca ŭ sacsietkach.
Miesca krušeńnia aśvietlena pražektarami i farami ad mašyn. Zaraz tudy starońnich nie prapuskajuć: na ŭvachodzie ŭ muziej staić achova. Pa słovach achoŭnika, krušeńnie adbyłosia kala 15 hadzin.
— Tam zaraz usie źjechalisia, prachod zabaronieny. Takoje hora ŭ ludziej… — skazaŭ jon.
Kim była zahinułaja dziaŭčyna, pakul nieviadoma. Raniej Rusłan raskazvaŭ, što bolšaja častka jaho pasažyraŭ — ludzi, jakim padaryli siertyfikat na palot.
Ciapier čytajuć
Novyja detali źniknieńnia Anatola Kotava. Jachta ź im źmianiła kurs na Abchaziju, dzie jaho vyvieli supracoŭniki FSB. Ale vykradańnie ci insceniroŭka?3333
Novyja detali źniknieńnia Anatola Kotava. Jachta ź im źmianiła kurs na Abchaziju, dzie jaho vyvieli supracoŭniki FSB. Ale vykradańnie ci insceniroŭka?33
«Ad biazvychadnaści źjeździŭ u Biełaruś, dzie jamu zrabili apieracyju». Pabracim raskazaŭ, što viadoma pra aryštavanaha kalinoŭca Andreja Siarhiejeva1313
Kamientary
- ci byvaje "zavalvańnie" i ŭ motadeltapłanaŭ, jak i ŭ samalotach?
h.zn. pieravyšeńnie dazvolenaha dla dadzienaha latalnaha aparata vuhła ataki?