Niahledziačy na abvieščanaje pieramirje, rasijskija vojski praciahvajuć ataki bieśpiłotnikami.
Niahledziačy na aficyjnuju zhodu bakoŭ na spynieńnie ahniu 9—11 maja, rasijskija vojski praciahnuli abstreły žyłych kvartałaŭ i infrastruktury, paviedamlaje ŭkrainski bok. Za druhi dzień pieramirja ŭ Danieckaj, Charkaŭskaj i Chiersonskaj abłaściach atrymali ranieńni 19 mirnych žycharoŭ.
Pavodle infarmacyi kiraŭnika Charkaŭskaj abłasnoj vajennaj administracyi Aleha Siniahubava, kala 22:00 9 maja rasijskija drony atakavali Industryjalny rajon horada. Adzin ź bieśpiłotnikaŭ trapiŭ u techničny pavierch dzieviacipaviarchovaha žyłoha doma.
Siarod paciarpiełych — dvoje 8‑hadovych chłopčykaŭ i try žančyny va ŭzroście ad 32 da 74 hadoŭ.
Na Chiersonščynie ŭ vyniku abstrełaŭ paraniena siem čałaviek, u tym liku adno dzicia. Paškodžany šmatpaviarchovik i 8 pryvatnych damoŭ.
Rasijskimi snaradami na Danieččynie paranieny dva žychary Družkoŭki, a taksama pa adnym čałavieku ŭ Kanstancinaŭcy i Dabrapolli.
Pavodle USU, u pavietranaj prastory Ukrainy z poŭnačy 10 maja było zafiksavana 27 bieśpiłotnikaŭ (usie źbityja SPA), adnak viečarovyja ataki 9 maja pryviali da realnych razbureńniaŭ i traŭmaŭ siarod hramadzianskaha nasielnictva.
Pa inicyjatyvie prezidenta ZŠA Donalda Trampa pieramirje abvieščana na 9, 10 i 11 maja.
Ciapier čytajuć
Siarhiej Cichanoŭski pierabraŭsia žyć u Łos-Andželes42
Kamientary