U Hrodnie źnieśli amal 100‑hadovy dom na rahu Mickieviča i Fiłareta — jašče adzin pomnik draŭlanaha kanstruktyvizmu
Draŭlany zialony budynak na rahu vulic Mickieviča i Mitrapalita Fiłareta ŭ Hrodnie źnieśli. Pra heta paviedamlajuć žychary horada ŭ sacyjalnych sietkach, piša Hrodna.life. Havorka idzie pra dom u styli draŭlanaha kanstruktyvizmu 1930‑ch hadoŭ, jaki praciahły čas pustavaŭ, a paśla jaho vyrašyli pierarabić pad hatel. Pieršapačatkova mierkavałasia zachavać častku doma. Ale, miarkujučy pa ŭsim, budynak hatela na hetym miescy pabudujuć nanova.
Prajekt budučaha hatela i płany na rekanstrukcyju
Raniej paviedamlałasia, što prajekt budučaj haścinicy pa vuł. Mickieviča, 1 praduhledžvaŭ rekanstrukcyju budynka. Paśla źjaviłasia infarmacyja, što ad pieršapačatkovaj pabudovy ŭ histaryčnym rajonie Novy Śviet zastanucca tolki dva fasady ŭ źmienienym vyhladzie. Taksama budzie pierarobleny i susiedni adnapaviarchovy dom 1915 hoda pabudovy.
Zhodna z prajektnaj dakumientacyjaj, na pieršym paviersie pavinny raźmiaścicca viestybiul hatela, restaran i kaviarnia. Druhi i treci pavierchi addali pad hatelnyja numary i apartamienty, a ŭ padvale płanavali abstalavać dapamožnyja pamiaškańni dla abjektaŭ hramadskaha charčavańnia.
U budynak źbiralisia pravieści centralizavanaje chałodnaje vodazabieśpiačeńnie, kanalizacyju, vientylacyju i kandycyjanavańnie, a aciapleńnie zapuścić ad prajektavanaj aŭtanomnaj kacielni. Zakazčykam rabot vystupaje handlovy dom «Šakocis».
Pakolki pabudova raźmieščana ŭ vodaachoŭnaj zonie raki Jurysdyka i ŭ zonie achovy historyka-kulturnaj kaštoŭnaści «Histaryčny centr Hrodna», realizoŭvać prajekt pavinny byli z ulikam kompleksnaha navukovaha daśledavańnia ad TAA «Navukova-prajektny centr «RESTABILIS». Usie ziemlanyja i budaŭničyja raboty patrabavali strohaha archieałahičnaha nahladu.
Budynak na rahu Mickieviča byŭ pabudavany paśla 1932 hoda, skazana ŭ daviedniku «Bijahrafija haradzienskich vulic». Jon źjaŭlajecca prykładam draŭlanaha kanstruktyvizmu. Na domie haryzantalnaja ašaloŭka. Asnoŭny abjom dvuchpaviarchovy. Kampazicyjnaja vyraznaść pabudavanaja na suadnosinach roznych pa vyšyni abjomaŭ modulaŭ. Nizkaschilny va ŭsie baki dach schavany za šyrokim karnizam. Vokny budynka roźniacca pa pamierach.
Na moduli pad kramu jany šyrokija, vitrynnyja, na žyłym majuć akanicy adnolkavaha fasonu, ale za košt padakonnych ciah usprymajucca jak adziny rytm. Małyja kvadratnyja akiency treciaha paviercha nadajuć hetaj častcy budynka vyhlad viežy. Mahčyma, u 1937 hodzie tut raźmiaščałasia adna z kram tavarystva «Ranak» (Jutrzenka).
Apošnija žychary vyjechali adsiul u 2017 hodzie. Siarod płanaŭ byŭ znos doma i budaŭnictva na hetym miescy handlovaha centra. U 2020 hodzie budynak vystaŭlali na aŭkcyjon razam z damami na Mickieviča, 7 i Mickieviča, 9. Dva apošnija tady pradali inšamu ŭłaśniku, raboty ŭ ich užo iduć.
Za apošnija miesiacy horad straciŭ jašče dva znakavyja budynki ŭ styli kanstruktyvizmu i funkcyjanalizmu.
Tak, u sakaviku 2026 hoda stała viadoma pra znos draŭlanaha doma mižvajennaha pieryjadu pa vulicy Asipienki, 3. Dom, pabudavany ŭ 1930‑ia hady ŭ styli funkcyjanalizmu i draŭlanaha kanstruktyvizmu, uvachodziŭ u ansambl «Nastaŭnickaj kałonii» — unikalnaha dla Biełarusi kompleksu draŭlanaj zabudovy.
U traŭni źnieśli jašče adzin draŭlany dom mižvajennaha pieryjadu — budynak pa vulicy Čkałava, 13. Jon byŭ pabudavany ŭ 1930‑ch hadach i ličyŭsia prykładam draŭlanaha kanstruktyvizmu. Dom taksama ŭvachodziŭ u «Nastaŭnickuju kałoniju».
U Vialikaj Bierastavicy źnieśli ŭnikalny zajezny dvor XIX stahodździa. Na ścianie z savieckich časoŭ visieła šylda «achoŭvajecca zakonam»
Draŭlany kanstruktyvizm pad koŭš: u Hrodnie źniščyli adzin histaryčny dom i ŭzialisia za druhi
U Hrodnie nie źnieśli stary budynak, a pačali jaho rekanstrukcyju. Voś jak jon budzie vyhladać
Ciapier čytajuć
Staršynia Rady biaśpieki zaklikaŭ biełarusaŭ ustrymacca ad pajezdak u Rasiju4
Kamientary