Historyki pieraścierahajuć: Rychtujecca «pravilnaje» mierkavańnie pra rekanstrukcyju Kałožy
U Hrodzienskim abłvykankamie pracuje telefonnaja linija, siabry BRSM apytvajuć hramadzianaŭ na vulicach horada.
Hrodzienski abłvykankam inicyjavaŭ apytańnie hramadskaści — pracuje admysłovaja telefonnaja linija, siabry BRSM raspytvajuć hramadzianaŭ na vulicach horada.
«Adnovim Kałožu razam!» — hramadskuju akcyju pad takoj nazvaj naprykancy lipienia inicyjavaŭ Hrodzienski abłvykankam. U ramkach akcyi było naładžanaje vyvučeńnie hramadskaj dumki nakont nieabchodnaści rekanstrukcyi Kałožskaj carkvy, pomnika dojlidstva CHII st.
U budnija dni da 31 žniŭnia ŭ abłvykankamie pracuje telefonnaja linija «Majo mierkavańnie». Z 12.30 da 14.30 pa telefonie 8 (0152) 72-00-09 luby achvočy moža padzialicca svaimi dumkami nakont losu staražytnaj carkvy.Na minułym tydni siabry hrodzienskaha BRSM ładzili apytańnie na vulicach horadu. A kolki dzion tamu na dziaržaŭnym telekanale «Hrodna» ŭ prahramie «Tema» ŭ žyvym efiry prymali ŭdzieł aŭtary prajektu rekanstrukcyi carkvy i historyk Ihar Trusaŭ. Padrabiaznaja infarmacyja pra chadu kampanii i prajekt budučaj rekanstrukcyi źmieščanaja na sajcie abłvykankamu.
Takaja aktyŭnaść uładaŭ naściarožvaje tych hrodzienskich historykaŭ, što pradstaŭlajuć alternatyŭnaje aficyjnamu bačańnie adnaŭleńnia i zachavańnia Kałožy.
«Za časami kiravańnia Uładzimira Saŭčanki nichto nie cikaviŭsia hramadskaj dumkaj nakont rekanstrukcyi taho ci inšaha pomnika ŭ Hrodnie. A ciapier navat BRSM padklučyli»,— kaža historyk Andrej Vaškievič. Na jaho dumku, ułada takim čynam rychtuje «pravilnaje» mierkavańnie pra rekanstrukcyju Kałožy. «Paśla skažuć, što jość tut niekalki krykunoŭ na sajtach, jakija lamantujuć, što ŭsio drenna i ničoha nie treba rabić, ale ich mała, a vuń kolki narodu vykazałasia za toje, kab Kałožu adnavić».
Zahadčyca kafiedry historyi Biełarusi HrDU imia Janki Kupały, prafiesar Śviatłana Marozava ŭchvalaje imknieńnie ŭładaŭ raicca z narodam. Adnak, u vypadku z takoj važnaj prablemaj, jak budučynia Kałožy, apošniaje słova musić być za śpiecyjalistami, upeŭnienaja jana. Spadarynia Marozava miarkuje, što
rekanstrukcyja Kałožy prosta nieabchodnaja, ale pry hetym sumniajecca ŭ kampietencyi tych, chto ŭžo siońnia biarecca za pracu nad šmatpakutnaj bažnicaj. «Bajusia, što ŭ Biełarusi pakul niama adpaviednych śpiecyjalistaŭ».Prafiesarka ŭdzielničała ŭ niekalkich mižnarodnych kanfierencyjach, pryśviečanych prablemie zachavańnia carkvy. Jana ličyć, što dahetul nie vyrašana pytańnie raki, jakaja ŭsio jašče pahražaje padmyć bierah.
Svajo bačańnie situacyi pradstaŭniki niezaležnaha hramadstva prezientujuć na staronkach niekalkich pryvatnych sajtaŭ, takich jak, naprykład, harodnia.com i hrodzienski błoh s13. Na ich dumku, praz adsutnaść miechanizmaŭ hramadskaha kantrolu za restaŭracyjaj takich važnych abjektaŭ, jak Kałoža, jaje moža napatkać los inšych hrodzienskich architekturnych pomnikaŭ.
Varta adznačyć, što niekalki miascovych niezaležnych internet-resursaŭ stali adzinymi placoŭkami, dzie ŭ zavočnaj dyskusii ŭdzielničajuć abodva baki. Dziaržaŭnyja ŚMI takim pluralizmam pachvalicca nie mohuć.
* * *
Rašeńnie ab praviadzieńni restaŭracyjna-adnaŭlenčych pracaŭ na carkvie Sv. Barysa i Hleba (Kałožskaj) było praniata ŭ śniežni 2008 h. na pasiedžańni Navukova-mietadyčnaj rady pry Ministerstvie kultury. Zamoŭcam i hienieralnym prajekciroŭščykam byŭ pryznačany «Instytut Hrodnahramadzianprajekt». Navukovym kiraŭnikom abjekta źjaŭlajecca kandydat mastactvaznaŭstva, dacent BNTU Hienadź Łaŭrecki. Hałoŭnym architektaram prajektu — Nina Jemialjanava.
Ciapier čytajuć
Milicyja zatrymała taho samaha rasijskaha turysta, jaki kinuŭ niedakurak na vulicy. Zaŭtra sud33
Kamientary