Polšča vyrašyła adabrać u «Hazproma» hazapravod Jamał-Jeŭropa

Ułady Polščy majuć namier adchilić «Hazprom» ad kiravańnia jahonym hazapravodam, jaki prachodzić praz terytoryju krainy.

Jeŭrakamisija patrabuje ad Polščy pryviadzieńnia ŭmovaŭ ekspłuatacyi miascovaha ŭčastka rasijskaha hazapravoda Jamał-Jeŭropa ŭ adpaviednaść z Trecim enierhapakietam ES, skiravanym na raźvićcio kankurencyi na enierhietyčnych rynkach Jeŭrasajuza. Pavodle hetaha dakumienta, hazapravody ŭ ES, jak i inšaja padobnaja infrastruktura, pavinnyja kiravacca niezaležnym orhanam i być dastupnymi trecim bakam.

«Kommiersant» śćviardžaje, što ŭ Polščy ŭžo jość płan pa vyviadzieńni hazapravoda z-pad kantrolu «Hazproma».

Pa dadzienych haziety, Gaz-System płanuje sama zaklučać damovy z pastaŭščykami hazu pa hazapravodzie Jamał-Jeŭropa i zabiaśpiečyć roŭny dostup trecich asob da jaho, a taksama ŭstaloŭvać tranzitnuju staŭku na prapampoŭku hazu pa terytoryi Polščy.

U Europolgaz zajavili, što hatovyja dać URE svoj varyjant pahadnieńnia. Heta adbudziecca na nastupnym tydni, paśla pieramovaŭ z kiraŭnikom «Hazprom-ekspartu» Alaksandram Miadźviedzievym. Rasijski bok hatovy zaklučyć z palakami apieratarskaje pahadnieńnie pa techničnym zabiaśpiečańni hazapravoda.

U vypadku, kali Europolgaz i Gaz-System nie ŭdasca damovicca, to vyrašeńniem pytańnia zojmiecca sam polski rehulatar. U hetym vypadku kiravańnie hazapravodam Jamał-Jeŭropa piarojdzie da Gaz-System na praciahu šaści miesiacaŭ na umovach, jakija ŭstaluje URE.

Dziejnaje mižuradavaje pahadnieńnie pa hazie z Polščaj, a taksama rasijski varyjant novaj damovy dazvalajuć zachavać manapoliju na tranzit hazu za «Hazpromam» i PGNiG da 2045 hoda. Da niadaŭniaha času polski bok byŭ zhodny z hetym, ale Jeŭrakamisija ŭmiašałasia ŭ pieramovy i zapatrabavała pierapisać dakumient.

Polščy patrabujecca 14 miljardaŭ kubamietraŭ hazu štohod, dźvie traciny hetaj kolkaści jana atrymlivaje z Rasii.

Varta adznačyć, što ŭrad Litvy ŭ lipieni razhledzieŭ zakonaprajekt ab raździaleńni nacyjanalnaha hazavaha kancerna Lietuvos dujos (na 37 adsotkaŭ naležyć «Hazpromu») na dva pradpryjemstvy (transpartnuju i handlovuju kampanii) nie paźniej za sakavik 2012. Anałahičnaje rašeńnie ŭ dačynieńni da hazavaj kampanii Eesti Gaas, jaki na 47 adsotkaŭ naležyć «Hazpromu» i «Itery», rychtuje Estonija.

U adkaz na dziejańni Vilni «Hazprom», adziny pastaŭščyk hazu ŭ Litvu, pryhraziŭ Vilni sudom u tym vypadku, kali ŭłady krainy buduć biez kansultacyj z kancernam refarmavać hazatranspartnuju sistemu.

• 0
• 0
• 0
• 0
• 0
• 0
• 0
• 0