Pra heta pišuć ukrainskija ŚMI.
Vinšavańnie Alaksandru Łukašenku ź pieramohaj na vybarach, nibyta nakiravanaje napiaredadni Novaha hoda ad imia prezidenta Ukrainy, mahli padrabić u Administracyi prezidenta Biełarusi.Pra heta paviedamili 3 lutaha ŭkrainskija ŚMI.
Ukrainskija vydańni źviartajuć uvahu na dziŭnuju strymanaść aficyjnaha Kijeva ŭ kamientarach padziej, jakija adbyvajucca ŭ susiedniaj respublicy. Taki stan rečaŭ kantrastuje ź situacyjaj papiarednich hadoŭ, kali čynoŭniki najvyšejšaha ranhu Ukrainy i Biełarusi achvotna kamientavali pierśpiektyvy raźvićcia dvuchbakovych adnosin va ŭsich śfierach.
Niezaležnyja ŚMI źviarnuli ŭvahu na toje, što ŭ Administracyi prezidenta Ukrainy nie kamientujuć paviedamleńnie pra toje, što prezident Janukovič pavinšavaŭ Łukašenku ź pieramohaj na vybarach. 3 lutaha pieršy namieśnik kiraŭnika Hałoŭnaha ŭpraŭleńnia pa humanitarnych pytańniach Administracyi prezidenta Ukrainy Aleh Mirus zrabiŭ šmatznačnuju zajavu:
«Na sajcie Janukoviča vinšavańniaŭ Alaksandru Łukašenku niama. Jość tolki paviedamleńnie na sajcie Łukašenki».Adkazvajučy na pytańnie, ci źjaŭlajecca hetaje vinšavańnie vydumkaj Minska, jon skazaŭ, što moža kamientavać tolki toje, što jość na sajcie prezidenta Ukrainy.
Aficyjny sajt Łukašenki raźmiaściŭ 31 śniežnia 2010 tekst vinšavańnia Viktara Janukoviča: «Upeŭnieny, što z Vašym pieraabrańniem na pasadu prezidenta respubliki Biełaruś supracoŭnictva pamiž našymi dziaržavami atrymaje novy praktyčny impuls. Aktyŭnaja dynamika ŭzajemadziejańnia dazvolić realizavać maštabnyja prajekty na karyść ukrainskaha i biełaruskaha narodaŭ». Na aficyjnym sajcie prezidenta Ukrainy dadzienaj vinšavalnaj telehramy da hetaha času niama.
21 śniežnia kiraŭnik departamienta infarmacyjnaj palityki Ministerstva zamiežnych spravaŭ Ukrainy Aleh Vałošyn zajaviŭ, što Ukraina zaniepakojenaja «niepraparcyjnym» užyvańniem siły ŭ dačynieńni da apazicyi i presy padčas vybaraŭ prezidenta Biełarusi 19 śniežnia. Vałošyn padkreśliŭ:
Ukraina maje namier aceńvać vybary prezidenta Biełarusi zhodna z zaklučeńniem ABSIE.
Dniami ŭ intervju polskim žurnalistam
Viktar Janukovič zajaviŭ, što nie sumniajecca ŭ pieramozie Alaksandra Łukašenki na vybarach, a voś taho, što adbyvałasia paśla, zrazumieć nie moža.
— Mnie zdałosia, što jon apošnim časam źmianiŭsia, što budzie bolš prahmatyčna stavicca da apazicyi. Kali ja havaryŭ ź im, dumaŭ, što jon źmianiŭsia da lepšaha. Ale kali ja ŭbačyŭ, što adbyłosia ŭ Biełarusi, ja byŭ ździŭleny. Praściej kažučy, jon pierahnuŭ pałku, — skazaŭ prezident Ukrainy.
Kamientary