Budziem lubić i biez uznaharody

Małady Front u druhi raz uručyŭ premiju za luboŭ da Biełarusi. Ale pieramožcy ŭ naminacyjach zastalisia bieź simvaličnych statuetak, bo ich skanfiskavali supracoŭniki KDB.

Za niekalki hadzin da ŭručeńnia premii «Lublu Biełaruś» stała viadoma, što supracoŭniki KDB skanfiskavali ŭ navučenca mastackaj vučelni «Hlebaŭki» 8 statuetak-uznaharod, jakija pryznačalisia dla pieramožcaŭ premii. 4 supracoŭniki KDB prosta pryjšli da maładoha čałavieka ŭ kvateru i biez składańnia pratakołu zabrali statuetki.

Napačatku imprezy, jakaja adbyłasia na Siadzibie BNF, arhanizatary premii paabiacali, što statuetki ŭznoviać. Adsutničali, adnak, nie tolki statuetki, ale i bolšaść pieramožcaŭ. Častka ich siadzić u turmie, druhaja — nieŭjaznyja. Dyj arhanizatary ŭručeńnia premii nie ŭsie zastalisia na svabodzie. Takaja heta było sioleta premija, sa ślazami na vačach.

U vaśmi naminacyjach na premiju było vyłučana 39 kandydataŭ — ad asobaŭ da fiestyvalaŭ.

«Biełarusizacyja»

U hetym hodzie ŭ halinie papularyzacyi biełaruskaj movy i kultury naminavalisia:

stvaralnik biełaruska-rasijskaha kamputarnaha pierakładčyka «Biełazar» Aleh Azaroŭski,

Biełaruskaja Vikipedyja,

staršynia Hrodzienskaha abłvykankama Siamion Šapira za ŭkaranieńnie biełaruskaj movy ŭ spravavodstva dziaržaŭnaj ustanovy,

pieršy fiestyval biełaruskaj rekłamy «Adnak»;

hałoŭny redaktar haziety «Źviazda» Uładzimir Narkievič.

Pieramožcam byŭ abvieščany prajekt Biełaruskaja Vikipiedyja.

«Pro-Belarus»

Z zamiežnikaŭ, što spryčynilisia da papularyzacyi Biełarusi ŭ śviecie, u hetym hodzie naminantami stali:

Maryja Soderbierh — kiraŭnička biełaruskaj supołki ŭ Šviecyi za karotkamietražnuju stužku «49»,

muzyčny fiestyval «Biłoruśka viesna» jaki prachodziŭ va Ŭkrainie,

Alaksiej Arciomaŭ — hramadzianin Rasii, jaki piša vieršy na biełaruskaj movie,

Tom Stopard — brytanski dramaturh,

arhanizatary fiestyvalu «Be2gether».

Pieramožcam była nazvana Maryja Soderbierh. Arhanizatary pažartavali, što ŭ ciapierašnich umovach jaje ziaŭleńnie ŭ Biełarusi małaimaviernaje.

«Žurnalistyka»

Za prafiesijnyja dasiahnieńni ŭ biełaruskaj žurnalistycy naminavalisia:

Źmicier Łukašuk — žurnalist Jeŭrapiejskaha radyjo dla Biełarusi,;

supolnaść niezaležnych žurnalistaŭ,

Taćciana Jełavaja — błohierka, što aktyŭna raspaŭsiudžvała infarmacyju ŭ błohach i sacyjalnych sietkach ab padziejach 19 śniežnia,

Siarhiej Darafiejeŭ — viadoŭca tok-šoŭ «Vybar» na kanale ANT,

Viktar Mališeŭski — žurnalist i analityk;

Tut pieramožcami staŭ Źmicier Łukašuk za vostryja pytańni Alaksandru Łukašenka ab losie kandydata ŭ prezidenty Uładzimira Niaklajeva.

«Kultura»

Naminantami ŭ halinie kultury byli:

Valer Bułhakaŭ — vydaviec časopisa «Arche»,

Redakcyja telekanała «Biełsat»,

«U nieskładovaje» — muzyčny prajekt,

Lavon Volski — lidar hurtu «NRM»,

biełaruskija ŭdzielniki akcyi «Z taburetam da akijana».

Pieramožcam byŭ abvieščany Lavon Volski.

«Palityka»

Za dasiahnieńni ŭ biełaruskaj palityčnaj śfiery naminantami 2011 hoda stali:

Uładzimir Niaklajeŭ — kandydat u prezidenty na vybarach-2010,

Jaŭhien Lipkovič — viadomy błohier,

Nasta Pałažanka — lidarka moładzievaha ruchu ŭ Biełarusi,

Mikałaj Statkievič — kandydat u prezidenty na vybarach-2010,

Aleś Michalevič — kandydat u prezidenty na vybarach-2010.

Ź piaci hierojaŭ hetaj naminacyi ŭ dadzieny momant u turmie ci pad chatnim aryštam znachodziacca čatyry. Pieramožcam u joj abvieścili Uładzimira Niaklajeva. Prysutny na imprezie Jaŭhien Lipkovič zrabiŭ karotkuju pramovu z pažadańniami chutčejšaha viartańnia palitviaźniaŭ na volu, a taksama publična pradstaviŭ svoj padarunak dla Nasty Pałažanki. Błohier padaryŭ joj svaju dyzajnierskuju sakołku «ŠOS» i paspadziavaŭsia, što ŭžo na 8 Sakavika Pałažanka jaje dakładna atrymaje.

«Sport»

Naminanty siarod biełaruskich spartoŭcaŭ za ŭniosak u hramadskuju čynnaść i kulturu:

Anton Puciła — paŭabaronca zbornaj Biełarusi pa futbole,

Maksim Mirny — tenisist i biźniesmen,

Vital Hurkoŭ — biełaruskamoŭny čempijon śvietu pa tajskim boksie,

Andrej Karalenka — 74-hadovy amatar biehu, na spartovaj formie jakoha zaŭsiody jość miesca nacyjanalnym simvałam.

Pieramožcam byŭ abvieščany Vital Hurkoŭ.

«Zmahar hoda»

Asobami, što śmieła i pryncypova abaraniali demakratyju i pravy čałavieka, stali:

Mikałaj Aŭtuchovič — vaŭkavyski pradprymalnik,

udzielniki Płoščy,

palitviaźni z Płoščy,

Barys Chamajda — raspaŭsiudnik niezaležnaj presy,

Mikałaj Kazłoŭ — padpałkoŭnik milicyi jaki abnarodavaŭ falsifikacyi parłamienckich vybaraŭ 2008 hodu.

Jak zajavili arhanizatary premii, adzinahałosna było vyrašana ŭ hetaj naminacyi ŭznaharodzić palitviaźniaŭ z Płoščy. Pamiatny dypłom za ŭsich achviaraŭ padziej 19 sakavika prymali pravaabaroncy.

«Hramadskaja čynnaść»

Naminantami tut stali nastupnyja ludzi i hramadzkija inicyjatyvy, što spryčynilisia da vyrašeńnia aktualnych prablemaŭ biełaruskaha hramadztva:

«Stop-bienzin» — kampanija aŭtaamataraŭ suprać padvyšeńnia cenaŭ na bienzin,

Chielsinski kamitet i «Viasna» — pravaabarončyja arhanizacyi,

«Sychodź» — hramadskaja inicyjatyva,

Daša Katkoŭskaja — arhanizatarka dapamohi zatrymanym i aryštavanym na Płoščy-2010,

«Abaronim les» — kampanija suprać vyrubki lesaparkavych zon u Salihorsku.

Ad imia BCHK i «Viasny» — pieramožcaŭ — dypłom atrymaŭ Aleś Bialacki.

Na zakančeńnie imprezy prysutnyja pasłuchali vystup Taćciany Biełanohaj i praciahnuli abmierkavańnie ŭznaharod u niefarmalnaj abstanoŭcy.

Nahadajem, što pieramožcami 2010 hodu byli: u naminacyi «biełarusizacyja» — kampanija «Budźma», «Pro-Belarus» — pasoł Šviecyi Stefan Eryksan, «žurnalistyka» — hazieta «Naša Niva», «kultura» — Mikałaj Chalezin i «Svabodny teatr», «palityka» — staršynia Partyi BNF Alaksiej Janukievič, «hramadskaja čynnaść» — Michaił Paškievič za stvareńnie kampanii «Za alternatyŭnuju słužbu», «sport» — fanackaja inicyjatyva pa adnaŭleńni futbolnaha kłuba «Tarpieda», «zmahar hoda» — palitviazień Arciom Dubski, jaki ŭ toj čas adbyvaŭ pakarańnie ŭ mahiloŭskaj kałonii.

* * *

«Kaho lubiš?» — «Lublu Biełaruś!» — «Dyk uzajemna!» — heta byŭ parol i vodhuk paŭstancaŭ Kalinoŭskaha.

• 0
• 0
• 0
• 0
• 0
• 0
• 0
• 0