Niaŭžo sudździaŭ pravierać na viedańnie dziaržaŭnych movaŭ?
Kanstytucyjny sud razhladaje nieabchodnaść zakanadaŭčaha zamacavańnia pravierki viedaŭ sudździami dziaržaŭnych moŭ. Pra heta havorycca ŭ adkazie z Kanstytucyjnaha suda, jaki atrymaŭ na svoj zvarot inicyjatar piersanalnaj kampanii «Spravavodstvapa-biełarusku !» Ihar Słučak.
«Vaša prapanova ab nieabchodnaści zakanadaŭčaha zamacavańnia paradku praviadzieńnia pravierki kandydata na pasadu sudździ na adpaviednaść patrabavańniam ab vałodańni dziaržaŭnymi movami Respubliki Biełaruś ciapier vyvučajecca ŭ Kanstytucyjnym sudzie», — ukazvajecca ŭ adkazie.
Jak paviedamiŭ Słučak, raniej u Kanstytucyjny sud, a taksama inšyja sudy Biełarusi, prakuraturu i Ministerstva justycyi im byli adpraŭlenyja zvaroty z prapanovaj zakanadaŭča ŭrehulavać pravierku viedaŭ kandydatami na pasadu sudździ biełaruskaj movy, jak hetaha patrabuje zakanadaŭstva, kab nie dapuskać da zaniaćcia sudovych pasad asob, jakija nie vałodajuć biełaruskaj movaj.
«Ź Viarchoŭnaha, Vyšejšaha haspadarčaha sudoŭ, prakuratury i Ministerstva justycyi pryjšli tolki farmalnyja adpiski, što hetaje pytańnie i tak urehulavana i nijakaha ŭdaskanaleńnia pracedury viedaŭ sudździami biełaruskaj movy nie patrabujecca. Liču, adnak, što prablema isnuje. I pachvalna, što Kanstytucyjny sud pastaviŭsia da jaje surjozna. Heta dazvalaje havaryć pra toje, što, mahčyma, i ŭ sudovaj śfiery biełaruskaja mova pačnie zajmać dastojnaje miesca, jaje dyskryminacyja pastupova źniknie», — ličyć Słučak.
Raniej aktyvist, pavodle jaho słoŭ, nakiravaŭ bolš za sotniu zvarotaŭ u roznyja ministerstvy, viedamstvy, arhanizacyi, vykanaŭčyja i rasparadčyja orhany z prapanovaj vieści spravavodstva na biełaruskaj movie.
Kamientary