Rasiejski ekspert: Biełaruskuju naftapierapracoŭku čakajuć novyja prablemy

U najbližejšaj i siarednieterminovaj pierśpiektyvie biełaruskuju naftapierapracoŭčuju halinu čakajuć novyja składanaści, ličyć hienieralny dyrektar daśledčaj hrupy "Pietramarkiet" (Rasija) Jakaŭ Ruderman. Z takim prahnozam jon vystupiŭ 13 krasavika ŭ Minsku na praktyčnaj kanfierencyi "Biełaruskaja naftavaja halina - učora, siońnia, zaŭtra".

Niahledziačy na "značnaje paharšeńnie ekanamičnaj situacyi" biełaruskich naftapieraprcoŭčych zavodaŭ, jany tym nie mienš zachavali "niekatoruju premiju ŭ dačynieńni da cen CIF, i heta, biezumoŭna, pakidaje im peŭny ekanamičny luk", zaznačyŭ ekśpiert.

Adnak, pavodle acenak Ja.Rudermana, situacyja moža ŭskładnicca ŭžo paśla 1 červienia, kli ekspartnaja pošlina na naftu dasiahnie ŭ Rasii 200 dołaraŭ za tonu. U hetym vypadku ekspartnaja pošlina na śvietłyja naftapradukty składzie kala 170-175 dołaraŭ za tonu, adpaviedna vyraście i pošlina na mazut.

Aprača taho, ličyć ekśpiert, dla biełaruskaha boku ŭ najaŭnaści ryzyki, źviazanyja ź pierśpiektyvami budaŭnictva Rasijaj novych trubapravodaŭ, jakija "mohuć akazać niehatyŭny ŭpłyŭ na zahruzku syravinaj biełaruskich NPZ". Havorka idzie pra budaŭnictva ŭ niedalokaj budučyni trubapravoda "Unieča - Prymorsk" u abchod Biełarusi, a taksama naftapravoda "Uschodńnia Sibir - Cichi akijan".

Jak patłumačyŭ kiraŭnik "Pietramarkieta", naŭrad ci ŭ najbližejšyja hady trubapravod "Uschodniaja Sibir - Cichi akijan" budzie zapoŭnieny ŭschodniesibirskaj naftaj. Dla jaho zapaŭnieńnia, miarkuje ekśpiert, buduć vykarystoŭvać zachodniesibirskuju naftu, jakaja adnačasova źjaŭlajecca resursam, što pastaŭlajecca ŭ Biełaruś. "Kali ekanomika novaha kirunku budzie davoli pryvabnaj, mohuć paciarpieć staryja rynki, u tym liku Biełaruś", - prahnazuje Ja.Ruderman.

U hetaj situacyi, pierakanany jon, "rašeńnie moža być znojdziena vyklučna na palityčnym uzroŭni".

U toj ža čas analityk zaznačyŭ, što siońnia "ryzyki radykalnaha źnižeńnia abjomaŭ pastaŭki nafty z Rasii ŭ Biełaruś nie isnuje". "Dakładniej, hetyja ryzyki buduć kampiensavany zacikaŭlenaściu Rasii ŭ zachavańni byłych abjomaŭ pastavak", - patłumačyŭ jon. Ekśpiert padkreśliŭ, što Rasija nie mienš za Biełaruś zacikaŭlena ŭ zachavańni raniejšych abjomaŭ pastavak nafty. Pavodle słoŭ Ja.Rudermana, "u Rasii alternatyŭnaha kirunku, kudy b jana mahła pierakinuć 12-15 młn. ton nafty, nie isnuje, i dla jaje strata biełaruskaha rynku taksama pahražaje niepryjemnaściami, u pryvatnaści skaračeńniem zdabyčy".

• 0
• 0
• 0
• 0
• 0
• 0
• 0
• 0