Maci aktyvista mižnarodnaj arhanizacyi «Małady front» (Čechija) Eduarda Łobava naviedała syna ŭ Ivacevickaj papraŭčaj kałonii № 5. Jak paviedamiła Maryna Łobava, z 16 pa 19 listapada ŭ jaje było doŭhaterminovaje spatkańnie z synam.
«U jaho ŭsio narmalna. Na ŭmovy ŭtrymańnia nie skardzicca.Sa zdaroŭjem taksama ŭsio ŭ paradku, choć niadaŭna jon byŭ prastudžany. Užo papraviŭsia. Trymajecca badziora, nastroj dobry», — skazała Maryna Łobava.
U kałonii Eduard, pavodle jaje słoŭ, nie pracuje. «Pracy tam niama, zastaŭsia tolki adzin rabočy atrad. Jon šmat čytaje, jamu vypisana šmat haziet, usie prychodziać. Taksama ŭ jaho šmat knih.Piša listy svaim siabram, ale asabliva ničoha novaha nie napišaš — dni padobnyja adzin na adzin, niama padziej, niama novych uražańniaŭ, usio adnastajna. Ab čym možna było napisać — jon užo daŭno napisaŭ», — skazała Maryna Łobava.
«Ciapier u jaho niama prablem i z administracyjaj kałonii, i ź inšymi źniavolenymi. U kałonii było ciopła, dobra hrejuć. Charčavańnie jak i ŭsiudy, nie horšaje i nie lepšaje», — paviedamiła maci źniavolenaha.
Čarhovaje spatkańnie z synam u Maryny Łobavaj budzie tolki praz paŭhoda. «Kali ŭsio budzie dobra i ŭ jaho nie budzie nijakich parušeńniaŭ», — dadała jana.
Lidar «Maładoha frontu» Źmicier Daškievič i aktyvist arhanizacyi Eduard Łobaŭ byli zatrymanyja ŭ Minsku 18 śniežnia 2010 hoda. Pavodle infarmacyi HUUS Minharvykankama, u dvary žyłoha doma pa vulicy Janki Bryla jany nibyta źbivali Kanstancina Savickaha i Aleha Małyšava. Zatrymańnie Daškieviča i Łobava pradstaŭniki apazicyi i pravaabaroncy rascanili jak previentyŭnuju mieru milicyi napiaredadni prezidenckich vybaraŭ 19 śniežnia 2010 hoda.
24 sakavika Daškievič byŭ pryhavorany da 2 hadoŭ pazbaŭleńnia voli ŭ kałonii ahulnaha režymu, Łobaŭ — da 4 hadoŭ u kałonii ŭzmocnienaha režymu.
«Mižnarodnaja amnistyja» pryznała Daškieviča i Łobava viaźniami sumleńnia.
Ciapier čytajuć
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ10
Kamientary