Film – 1,5-hadzinny padman hledača. A Nikałas Kiejdž vučyŭsia aktorskamu majsterstvu ŭ hierojaŭ kamputarnych hulniaŭ.
Prarok (Next)
ZŠA, 2007, kalarovy, 96 chv.
Režyser: Li Tamachory
Roli vykonvajuć: Nikałas Kiejdž, Džuliana Mur, Džesika Bił, Tomas Kretčman, Tory Kitłz, Chase Dzuniha
Žanr: Fantastyčny trymcieńnik pavodle ramanu Filipa Dzika
Adznaka: 4 (z 10)
Štukar z Łas-Vehasa Krys Džonsan zdolny bačyć pryšłaje. Usiaho tolki na dźvie chviliny napierad, ale hetaha dastatkova, kab jahonym daram zacikaviłasia FBR. Krys uciakaje ad ahientaŭ i ad bandytaŭ i sprabuje naładzić asabistaje žyćcio ź dziaŭčynaj, jakuju doŭha čakaŭ, ale ad svajho losu nie ŭciačeš…
Li Tamachory pračytaŭ Filipa Dzika, pa ramanam jakoha pastaŭleny “Biahun pa lazu brytvy” j “Uzhadać usio” – jak ahitku dla “vorhanaŭ” i kamputarnuju hulniu z zašmalcavanym persanažam.
Krys Džonsan (Nikałas Kiejdž) bačyć pryšłaje – i praihryvaje jaho ŭ svajoj hałavie. Raznastajnyja varyjanty napačatku mohuć zabaŭlać, jak niaŭdałaje zalacańnie łuzera da pryhažuni (scena ŭ kamplekcie jość) – ale chutka pryjadajucca. Hieroj viedaje, kudy trapić kula, kali vybuchnie bomba i što rabić, kab uciačy ad pahoni. Spačuvać takomu hieroju niemahčyma – navat, kali niaščasnaha katuje Džulijana Mur, pastaviŭšy niebaraku ŭ vočy rasporki (skradziena ŭ “Zavadnoha apelsina” Stenli Kubryka).
Ale možna razhladać hieroja, jak kamputarny persanaž.
Spryjaje hetamu j Nikałas Kiejdž, jaki peŭna braŭ ŭroki majsterstva ŭ hierojaŭ kamputarnych hulniaŭ. Liryčna-prazorlivy tvar, prazorliva-niaščasny tvar… – chopić, bolš nia treba!
Finalnaja “padstava” – prosta dabivaje. Łabavaja adnamiernaja maral – “usie štukary na supracu z vorhanami!” – heta jaŭna nie Filip Dzik. I navat nie halivudzki trymcieńnik. Na BT, kali łaska, u “Sielski čas”!
Ale, kali “padstavaŭ” nie zaŭvažać, – to film padasca narmalnym siarednim bajevičkom.
Ciapier čytajuć
Što viadoma pra žančynu, jakaja zahinuła ŭ aŭtobusie, što vioz biełaruskich futbalistaŭ-školnikaŭ u Hielendžyk?15
Što viadoma pra žančynu, jakaja zahinuła ŭ aŭtobusie, što vioz biełaruskich futbalistaŭ-školnikaŭ u Hielendžyk?
Cichanoŭskaja pra ŭdar pa aŭtobusie ź biełaruskimi dziećmi: Nie ryzykujcie žyćciom — nie jedźcie ŭ Rasiju, jakaja viadzie złačynnuju i niespraviadlivuju vajnu2121
Kamientary