Ź Biełarusi za subotu j niadzielu

Ź Biełarusi za subotu j niadzielu

Pakazalnyja vystupy ŭ Baravoj

U Baravoj pad Mienskam u niadzielu prajšli pakazalnyja vystupleńni i avijašoŭ z nahody 65-hodździa ŭtvareńnia nacyjanalnaha avijaklubu.

U Łašy raźbili pomnik Karskim

U vioscy Łaša Haradzienskaha rajonu na miascovych mohiłkach niechta raźbiŭ na kavałki čyhunny pomnik, ustanoŭleny ŭ mižvajenny čas Ivanam Karskim — dziadźkam akademika Jaŭchima Karskaha, aŭtara «Biełarusaŭ». Pomnik mieŭ vyraznyja ŭnijackija rysy. Na prymacavanaj šyldzie byli paznačanyja proźviščy ŭsich Karskich, pachavanych u tutejšaj ziamli. Krajaznaŭca Apanas Cychun ličyć, što heta satanisty pryłažylisia. Sp. Cychun padrychtavaŭ byŭ medaljon Ivana Karskaha, znanaha falklarysta, kab prymacavać na mahile apošniaha, adnak ciapier vahajecca — ci nia pojdzie na hłum i hety znak? Jon ža na mohiłkach vyjaviŭ jašče adnu zakinutuju mahiłu svajaka akademika Jaŭchima Karskaha. Varta tut pryhadać, što paru hadoŭ tamu ŭ Łašy začynili muzej akademika.

Z Horadni — Anton Łabovič

Maŭčy i dyš

U piatnicu ŭ Miensku pačalisia pieramovy pamiž pradstaŭnikami Łukašenki i apazycyi. Temaju byli telebačańnie j presa. Apazycyja patrabavała času na telebačańni. ABSE dabivałasia, kab arhanizavali teledebaty. Łukašenkaŭ ža pradstaŭnik Sazonaŭ ničoha nie dabivaŭsia — siadzieŭ, maŭčaŭ, vietliva paśmichaŭsia i abiacaŭ razhledzieć prapanovy. Dziŭnaja pazycyja apazycyi — jana nie patrabuje, kab u krainie kožnamu było dazvolena stvarać radyjo j TV, nie patrabuje adnavić Radyjo 101,2, a vymahaje mifičnaha času na BT. Byŭšy Łukašenkam, my dali b joj hety čas. Chaj nahavoracca adzin pierad adnym.

Bojka pad Voršaj z nunčakami

Učora na Krapivienskim poli prajšoŭ tradycyjny festyval na ŭhodki bitvy pad Voršaj. Na śviata niečakana pryjechali 60 chłopcaŭ z supołki «Kraj» — toj, što prajšła šeściem z pachodniami ŭ Horadni ŭ krasaviku. Jany praviali pakazalnyja rukapašnyja bai i bojki z nunčakami. Heta było cikaviej, čym rycarskija bai.

Z Krapivienskaha pola — Andrej Mialeška

Takija daktary

U Bieraści adzin čałaviek, Uładzimier K., zachvareŭ na hiemaroj, pajšoŭ da daktaroŭ, tyja jamu vypisali leki, a nie skazali, što jany niesumiaščalnyja z alkaholem (mo j nia znali). A jon uvohule nia piŭ, ale trochi vypivaŭ. Nu, i źjeŭ tych tabletak dy ŭviečary trochi vypiŭ — užo dva tydni ŭ encefalitnym stanie lažyć u reanimacyi.

Ź Bieraścia — Alaksandra Koŭtun

BASu — 10

18 vieraśnia Biełaruskaje abjadnańnie studentaŭ u Polščy (BAS) adznačyć svaje 10-ja ŭhodki. Z nahody ŭ Supraśli ŭ kulturnym asiarodku «Pušča» adbudziecca ŭračystaja viečaryna. Siarod zaprošanych haradzienski bard Viktar Šałkievič. Miarkujecca, što j Siaržuk Sokałaŭ-Vojuš z Prahi padjedzie.

Z Horadni — Anton Łabovič