CUKROVYJA RADAŚCI
10 lutaha ŭ Skidali ŭračysta adznačyli vyrab dvuchmiljonnaj tony cukru. Nasypali vialiki miech, jaki važyŭ, naturalna, mienš za tonu, i napisali: «2000 h., fievral». Pieršuju tonu skidalcy vyrabili ŭ 1982-m, na što im spatrebiłasia amal 40 hadoŭ.
Reč u tym, što kaliści heta byŭ Pieršy biełaruski cukrovy kambinat, pabudavany ŭ 1951 hodzie, pra što viedaŭ sam tavaryš Stalin. Zatym pastavili zavody ŭ Haradziei, Žabincy, Słucku. Dziaržaŭnyja mas-medyi paviedamili, što z nahody dvuchmiljonnaj tony adbyŭsia navat mitynh. Voś, akazvajecca, dla čaho patrebnyja mitynhi — nie kab aburacca i buntavać, a — kab radavacca sałodkamu žyćciu.
Miž tym, aburacca jość čym. Značnaja častka skidalskaha cukru kantrabandaj nakiroŭvajecca ŭ susiedniuju Litvu. Voś i ŭ minuły paniadziełak, za try dni da «cukrovaha śviata», supracoŭniki aperatyŭnaha adździełu Varenskaha atradu pamiežnaj palicyi razam sa specnazam zatrymali na šašy Salečniki—Ejšyški, na trecim kilametry ad biełaruskaj miažy, hruzavik. A ŭ tym hruzaviku — 220 miachoŭ, pa 50 kh kožny, kantrabandnaha cukru z etykietkami Skidalskaha cukrovaha kambinatu.
Jak pryznaŭsia kiroŭca, vileniec H.V., što pracuje ŭ adnym ź litoŭskich akcyjanernych tavarystvaŭ, načalnik zahadaŭ jamu zajechać u peŭnaje miesca, pakinuć mašynu i «źniknuć». Ciapier H.V. «śviecić» da piaci hadoŭ z kanfiskacyjaj...
I dobra, kab heta byŭ adzinkavy vypadak. Dyk ža tolki sioleta litoŭskija pamiežniki ŭžo zatrymali 49 ton kantrabandnaha skidalskaha cukru. A letaś, za hod, — ažno 141 tonu. Jak bačym, «rastuć pakazčyki». Značyć, nia ŭsio tyja pamiežniki zatrymlivajuć, bo inakš kantrabandysty nie vazili b. Vychodzić, rana mitynhavać, tavaryšy.
Siarhiej Maksimovič, Aleś Kiebik
Ciapier čytajuć
Kab nie siadzieć u Rasii za narkotyki, małady danosčyk z Ašmianaŭ zapisaŭsia na front. Dyj zhinuŭ5
Kamientary