Akcyja lubovi: pa ŭsioj krainie

Akcyja lubovi: pa ŭsioj krainie

14 lutaha ŭ Bieraści niekalki dziasiatkaŭ maładych ludziej vyjšli na šeście ŭ centry horadu, razdajučy bieł-čyrvan-biełyja sardečki j vinšavańni-valancinki; naprykancy šeścia maładafrontaŭcy ŭtvaryli «pałajučaje serca» sa śviečkami. Pačałosia ŭsio z padačy zajavy ŭ harvykankam staršyniom bieraściejskaha Maładoha Frontu Sieržukom Bachunom z prośbaj dazvolić pikiet na rahu Puškinskaj i Karła Marksa, u centry horadu. Ale ŭłady skazali «nie» i prapanavali pravieści akcyju na stadyjonie «Budaŭnik» na ŭskrajku Bieraścia. Z takim pośpiecham možna było b «śviatkavać» na mohiłkach u miesiačnuju noč. Tamu, niahledziačy na ryzyku, vyrašyli pravodzić u centry biez dazvołu. Abyšłosia.

U Mahilovie ŭ noč z 13 na 14 lutaha ŭ parku imia Horkaha źjaviŭsia vializny, 2x3 metry, transparant «Ja lublu Biełaruś!», jaki byŭ źniaty tolki ŭ aŭtorak. Miascovaja niezaležnickaja moładź naładziła viečarynu z konkursam na «lepšuju paru-2000», a Małady Front prajšoŭsia śviatočnaj kalonaj pa centralnaj vulicy Lenina da Domu Savietaŭ — kala 30 čałaviek ź bieł-čyrvan-biełymi sercami na hrudzioch razdavali ludziam vinšavańni, a paśla sfatahrafavalisia pad nacyjanalnym ściaham na fonie pomnika pravadyru. Usio prajšło spakojna, i navat milicyjant, što padychodziŭ da viasiołaha šeścia, syšoŭ zadavoleny, z sardečkam, dy bolš nie čaplaŭsia da maładych.

U Babrujsku takoje ž šeście skončyłasia jašče bolš pryvabna. Tam chłopcy i dziaŭčaty z Maładoha Frontu, «Kraju», «Hramadzianskaha forumu» ź bieł-čyrvan-biełymi symbalami j hitarami prajšli šeściem ad miascovaha paštamtu da pł.Pieramohi, dzie sieli zamknionym łancuhom u formie serca, žartavali, śpiavali pieśni, tančyli. Milicyja nikoha nie čapała, ale zdymała na kameru.

U Homieli bolš za 20 maładafrontaŭcaŭ vyjšli na pikiet la «DK miascovaje pramysłovaści».

U Horadni na dazvoleny ŭładami masavy pikiet pad bieł-čyrvan-biełym ściaham vyjšli pradstaŭniki Maładoha Frontu, maładahramadoŭcy i maładyja chryścijanie-kataliki. Razdavali admysłovyja vinšavalnyja kalandaryki i ŭlotki; sacyjał-demakraty nadzialali achvotnych prezervatyvami, a chryścijanie hutaryli z zacikaŭlenymi pra luboŭ čałaviečuju j Božuju; u medynstytucie studentam zładzili biełaruskuju dyskateku.

Samym masavym z abłasnych centraŭ było śviatkavańnie Dnia Valancina ŭ Viciebsku. Tutejšaja NGO «Siomaja hrań» razam z maładafrontaŭcami j sacyjał-demakratami atrymała dazvoł na trochhadzinny pikiet la filarmonii. Moładź prosta na płoščy pastaviła scenu z dobrym hukaŭzmacnieńniem, i z 14 da 17 hadzin pad biełaruskuju j zamiežnuju muzyku pravodzili konkursy dy vinšavańni. Milicyjanty, jakija śpiarša biezvynikova sprabavali zatrymać Barysa Chamajdu za razdaču hazety «Vybar», potym sami ž uziali ŭdzieł u rozyhryšy pryzoŭ. U vuličnaj biełaruskaj hulancy ŭdzielničali tysiačy čałaviek.

U Maładečnie na miascovaj piešachodnaj vulicy — «bradvei» — niekalki dziasiatkaŭ maładafrontaŭcaŭ zapalili śviečki i skandavali «Žyvie Biełaruś!». Chto ź minakoŭ adkazvaŭ «Lublu Biełaruś», tamu davali prezervatyvy.

U Baranavičach Maładomu Frontu zabaranili 13 lutaha ahulnaharadzkuju biełaruskuju dyskateku — maŭlaŭ, epidemija hrypu.

U Navapołacku Dzień Valancina adznačyli studenckaj viečarynaj u PDU, a ŭ Vaŭkavysku ŭ moładzi atrymałasia cudoŭnaje «pałajučaje serca».

U mienskaj «akcyi lubovi» ŭziali ŭdzieł kala 500 čałaviek. Ludzi sabralisia na placy Jakuba Kołasa a pałovie na šostuju ŭviečary. Mienš jak praz paŭhadziny natoŭp moładzi, kryčučy lozunh usich zakachanych «Žyvie Biełaruś!», pryjšoŭ da zaśniežanych prystupak placu Paryskaje kamuny. Stajaŭ harmidar, mihcieli elektryčnyja sercajki, źvinieli zvanočki... Chapunu nie było, skiny nia leźli. Bo ŭsie byli zakachanyja j mirnyja ludzi. BT pastaviła Małady Front u prykład BPSM za arhanizacyju Dnia zakachanych. «Akcyja Lubovi» nie mierkavałasia jak repetycyja da «Maršu Svabody» j «Dnia Voli». Mahčyma, niešmatludnaj jana atrymałasia, bo arhanizatary padkreślivali jaje niepalityčny charaktar.

Bieł-čyrvan-biełyja sercy, zvanočki j śviečki stalisia paŭsiudnymi symbalami 14 lutaha. Sioletniaja «Akcyja lubovi» — ci nia pieršaja masavaja ahulnabiełaruskaja kampanija biez adzinaha zatrymańnia.

Pavał Sieviaryniec, Aleś Laŭčuk, Symon Hłazštejn, Viktar Muchin