Naviny

 Naviny

BNF — 5000

Učora, 18 krasavika, paśviedčańnie siabra BNF ź piacitysiačnym numaram było ŭračysta ŭručanaje ŭ miastečku Navajelnia Dziatłaŭskaha rajonu. Atrymała jaho nastaŭnica biełaruskaj movy i litaratury Navajelnianskaj siaredniaj škoły Hanna Dudar. Uručali paśviedčańnie staršynia BNF «Adradžeńnie» i Partyi BNF Vincuk Viačorka i jaho namieśnik Viačasłaŭ Siŭčyk.

«Toje, što my vypisvajem piacitysiačnaje paśviedčańnie, nia značyć, što nas tolki piać tysiačaŭ, bo ŭ BNF jość siabry arhanizacyi, jakija prymajuć na siabie asnoŭny ciažar pracy, a jość prychilniki, jakich vielmi i vielmi šmat. Asabliva pryjemna, što aktyvisty BNF — heta našaja nacyjanalnaja intelihiencyja», — zaznačyŭ Vincuk Viačorka.

Ciapier u Navajelni isnujuć try supołki BNF, jakija naličvajuć 19 siabroŭ.

Pres-słužba BNF

Smalenčukoŭ vučym

U PTV №218 Amścisłaŭščyny navučajecca kala 30 hramadzianaŭ Rasiei. Padstavaj tamu — prahmatyčny raźlik. U rasiejskich PTV za vučobu treba płacić dobryja hrošy, a ŭ Amścisłavie nia tolki biaspłatna vučać, ale jašče j kormiać biaspłatna. Moładź susiednich z Amścisłaŭskim Chisłavickaha, Manastyrščynskaha i Vialiskaha rajonaŭ Rasiei vielmi zadavolenaja mahčymaściu navučacca na histaryčnaj radzimie.

Andrej Kuźmin, Kryčaŭ

U Połackim universytecie nia palać

Rektar Połackaha ŭniversytetu prafesar Ernst Babienka padpisaŭ zahad ab zabaronie paleńnia ŭ VNU. Z 20 krasavika zabaroniena «dymić» va ŭsich navučalnych dy słužbovych pamiaškańniach, internatach, faje j kalidorach miascovaje Alma Mater. Zabarona vyklikanaja kłopatam pra zdaroŭje studyjozusaŭ dy ichnych vykładčykaŭ. Za minuły hod z-za chvarobaŭ studenty PDU ahułam prapuścili 11850 navučalnych dzion, vykładčyki j supracoŭniki ŭniversytetu — 6400 dzion. Vialikaja kolkaść chvarobaŭ źviazanaja z zachapleńniem tytuniom. Zhodna z statystykaj, siarod biełaruskich studentaŭ palać kala 65% chłopcaŭ i 30% dziaŭčat. Bolš za 15 tysiačaŭ čałaviek pamiraje štohod ad chvarobaŭ, vyklikanych kureńniem.

Andrej Alaksandraŭ, Navapołacak

Prajezd padaražeŭ

U pryharadnych aŭtobusach — na 50%, u mižharodnych — na 20% z 20 krasavika.

Lasnaja aryjentacyja

Ad ranku 16 krasavika na vabnaj palancy ŭ lesie pad Barysavam havaryli tolki pa-biełarusku. Tut sabralisia junaki j dziaŭčaty, kab pravieści spabornictvy. Usio pačałosia ź śpiavańnia himnu «Mahutny Boža», na časovym flahštoku byŭ uźniaty bieł-čyrvona-bieły ściah. A zatym startavaŭ čempijanat pa spartovym aryjentavańni. Siem kamandaŭ z Barysava, troch vakolnych viosak i Miensku zmahalisia za pieršaje miesca. Taksama stavili namioty, pieraciahvali kanat, pakazvali majsterstva ŭ boksie i ŭschodnich adzinaborstvach. Lepšym uručyli dyplomy z nacyjanalnaj symbolikaj, a junakam, jakija vyrašyli pracavać dziela svabodnaje Biełarusi ŭ šerahach Maładoha Frontu, taksama — maładafrontaŭskija paśviedčańni. Trojka pryzeraŭ vyhladaje tak: pieršaje miesca — junaki z barysaŭskaha Maładoha Frontu, druhoje — hości ź Miensku, treciaje — kamanda školnikaŭ ź vioski Hlivin.

Siaržuk Sałaš, Barysaŭ

Płaci ŭ dubal

Vaŭkavyskija ŭłady pryniali rašeńnie, što prajezd u haradzkim transparcie ŭ subotu dy niadzielu budzie kaštavać u dva razy daražej, čym u budni. Navat i šyldačku paviesili: «Maršrutnaje taksi». Ludzi j sto rubloŭ buduć płacić, aby tolki dobra chadziła i davoziła kudy treba.

Valer Bohdan, Vaŭkavysk

Nalot na Piečy

U noč z 21 na 22 krasavika Barysaŭ ablapili nalepkami «Čarnobylskaha Šlachu», paštovyja skryni zakidali ŭlotkami. Asabliva moładź razharnułasia ŭ vajskovym haradku Piečy. Tut ablapili ŭsie kramy, rynak, kaviarniu, šapiki, cyrulniu, adździeł suviazi, aporny punkt, čyhunačny j aŭtobusny prypynki, škołu. Apošniaja ŭvohule zaznała sapraŭdnuju ataku nalepak. Ci nia ŭsie vokny byli ŭ «My — narod». Moładź nadta pastarałasia sa škołaju, bo, kažuć, mocna nia lubić svajoj dyrektarki Niły Cimochavaj, jakaja pojedam jeść biełaruskich nastaŭnikaŭ. Ranicaj u Piačach huło. Adno j čuvać było, što Čarnobylski Šlach dy Čarnobylski Šlach. Užo viadoma, što z adnych Piečaŭ na Šlach u Miensk u sieradu źbirajecca kolki dziasiatkaŭ čałaviek moładzi.

Siaržuk Sałaš, Barysaŭ

Zuby za hrošy

I da Mścisłava dajšła moda na płatnaje lačeńnie zuboŭ. Savieckaja daromščyna kančajecca. Robicca heta dziela harotnaha stanu miascovaj stamatalohii, jakaja atrymlivaje ŭsiaho 22% srodkaŭ ad patrebnaha. Jakaść cementaŭ, jakija ŭžyvajucca dla plombaŭ, ničoha nia vartaja — plomby razburajucca ŭžo praz try miesiacy. Uva ŭsim śviecie zabaronienyja takija metady lačeńnia, jak myšjakovisty i rezarcyn-farmalinavy, bo škodnyja dla zdaroŭja, ale ŭ Amścisłavie karystajucca tolki imi. Słovam, u stamatalohii paraluš. A lačycca treba, bo na Mścisłaŭščynie siońnia 97% nasielnictva pakutuje ad roznych zubnych prablemaŭ, a 65% majuć patrebu ŭ pratezavańni.

Kataliki Ŭschodu

Z hod tamu ŭ Kaściukovičach adnaviła dziejnaść katalickaja carkva. Katalickaja hramadka składaje ŭ hetym 17-tysiačnym horadzie krychu bolej za 20 čałaviek. Pakul vierniki źbirajucca ŭ pryvatnym domie, ale pad budučy kaścioł užo kupili dvuchpaviarchovy budynak, u jakim raniej byŭ internat. Raniej u Kaściukovičach byŭ svoj ksiondz, ale jon pajechaŭ u Zachodniuju Biełaruś u pošukach kaścioła, dzie było b bolš parafijanaŭ. Ciapier słužyć ksiondz Andrej, jaki pryjaždžaje z Amścisłava.

Andrej Kuźmin, Kryčaŭ

Ciahniki pieramohi

26 krasavika z Baranavičaŭ na Bieraście adpravicca turystyčny ciahnik, pieršy za apošnija 10 hadoŭ. Pasažyrami buduć 600 školnikaŭ i studentaŭ navučalnych ustanovaŭ horadu, jakija pahulajuć pa abłasnym centry dy naviedajuć Bieraściejskuju krepaść. Pryśviačajecca hety pachod 55-m uhodkam pieramohi i maje na mecie nia dać častcy moładzi pajechać u Miensk na Čarnobylski Šlach. Raniej na ciahnikach Pieramohi vazili tolki veteranaŭ, kab tyja mahli «vypić pa čaračcy» i raspavieści adzin adnamu pra svaje hieraičnyja ŭčynki.

Abłava na bahatych

Uviečary 14 krasavika Baranavičy naviedała 1-ja vučebnaja rota MUS v/č 5448. «Vučni» zavitali ŭ adzin z samych darahich dyskaklubaŭ horadu «Džokier», a paśla padalisia ŭ darahi bar «Admirał». Hości ź Miensku nia tančyli i nie pili. Ludzi ŭ čornym, u maskach i z dubinkami, stroili ŭsich chłapcoŭ uzdoŭž ściany ruki za hałavu, paśla vyvodzili z zali, praviarali dakumenty i adpuskali.

Rašetnik pra Hienijuš

Viečaryna, pryśviečanaja 90-m uhodkam z dnia naradžeńnia Łarysy Hienijuš, adbyłasia ŭ Baranavickaj biblijatecy. Arhanizavała jaje miascovaja filija TBM. Byli vyznačanyja pieramožcy konkursu tvoraŭ, pryśviečanych Ł.Hienijuš. Taksama pierad prysutnymi vystupiŭ Piatro Rašetnik, jaki adbyvaŭ termin u adnym lahiery z paetkaj.

Rusłan Raviaka, Baranavičy

Hiama salidarnaści ŭ kantraloraŭ

Vaŭkavyskija kantralory vybralisia ŭ Horadniu. I ci to zabylisia, što znachodziacca ŭ čužym horadzie, ci paspadziavalisia na salidarnaść haradzienskich kantraloraŭ, ale za prajezd nie zapłacili. Usio b dobra, ale haradzienskija kantralory ich złavili, i choć tyja pakazvali svaje vaŭkavyskija paśviedčańni, a ŭsio adno daviałosia płacić štraf. Zaraz vaŭkavyskija złyja na haradziencaŭ, tamu kali vas zatrymajuć u Vaŭkavysku za prajezd zajcom, nizavošta nie kažecie, što Vy z Horadni, a to budzie jašče horš.

Valer Bohdan, Vaŭkavysk

Pravincyjny dyjaloh

Na pačatku sakavika ŭ Astravieckim rajvykankamie sustrelisia pradstaŭniki rajonnaj arhanizacyi AHP Ivan Kruk i Mikałaj Ułasievič z «vertykalščykam» Adamam Kavalkam. Pahutaryli ab prablemach miascovaha žyćcia, vykazali svaje adnosiny da taho, što robicca ŭ krainie, i pieradali zajavu, dzie zapatrabavali ad ułady nieadkładna likvidavać zapazyčanaść pa zarpłacie biudžetnikam i pavysić jaje na 50%, a taksama kab ludziej nadzialili ziamielnymi ŭčastkami dla asabistaj haspadarki. Bolš za toje, napisali ŭ miascovuju «rajonku» infarmacyju pra hetuju sustreču, a ŭ adkaz ad redaktarki «Astravieckaj praŭdy» Niny Rybik atrymali list, što taja infarmacyja nia budzie nadrukavanaja, bo nie ŭjaŭlaje dla čytačoŭ cikavaści. Mabyć, bolšaść čytačoŭ lubić čytać pra nadoi dy pasiaŭnyja.

Marjan Vianhroŭski, Astraviec

Ad niama čaho rabić

U Astravieckim rajspažyŭtavarystvie źjaviłasia prosta navatarskaja ideja. Va ŭsich kramach rajonu i rajcentru charčovyja tavary, što jość u prodažu, dazvolena pradavać tolki sa specyjalnaj piačatkaj rajspažyŭtavarystva. Jana jość ciapier nia tolki na harełcy ci cyharetach, ale navat i na pačkach ź piečyvam. «Štampavali» tavary adkaznyja asoby ź liku kiraŭnikoŭ rajspažyŭtavarystva naroŭni z pradaŭcami. Navošta patrebnyja «miascovyja akcyzy», nieviadoma...

Jury Haŭryłaŭ, Astraviec