Eŭrapiejskaja Kuba

tydzień našaha žyćcia

Eŭrapiejskaja Kuba

Tydzień pačaŭsia z vystupleńnia budučaha pasła Ameryki ŭ Biełarusi Majkła Kozaka ŭ Senacie, jakoje źviarnuła na siabie ŭvahu tym, što jon pracytavaŭ słovy ź letašniaha senackaha dakładu pra Biełaruś, u jakim našu krainu nazyvajuć «eŭrapiejskaj Kubaj». Jon taksama skazaŭ: «Palityka, aperacyi i prablemy biaśpieki, ź jakimi my sutykalisia na Kubie, vielmi padobnyja da tych, jakija maje pasolstva ŭ Miensku». I taksama: «Biełaruś — kraina, što pieražyvaje surjozny kanstytucyjny j palityčny kryzys, vyklikany niekanstytucyjnymi sprobami... Prezydenta padoŭžyć čas svajho znachodžańnia na pasadzie i padparadkavać vykanaŭčaj uładzie ŭsie značnyja dziaržaŭnyja instytucyi». Majkł Kozak vykazaŭ razumieńnie taho, što «hety kryzys, kali nie źviartać na jaho ŭvahi, moža istotna zakranuć intaresy susiedziaŭ Biełarusi. A padtrymka Biełarusiaj varožych Amerycy režymaŭ moža zakranuć intaresy samoj Ameryki». Jon źviarnuŭ uvahu na toje, što rytoryka Łukašenki j Kastra vielmi padobnaja. U toj ža čas jon padkreśliŭ, što ZŠA nie źbirajucca padtrymlivać adnu ci druhuju palityčnuju siłu krainy. Hety vystup Kozaka vyklikaŭ rezkuju reakcyju MZS RB, jakoje nazvała acenki, što prahučali, «paśpiešlivymi».

Pryznačeńnie ŭ Biełaruś specyjalista pa Kubie j Haici śviedčyć pra toje, što z Łukašenkam nie źbirajucca «cackacca».

Biełaruskaja apazycyja demanstravała na hetym tydni svaju jednaść: vyrašyli pravieści 2 lipienia, napiaredadni čarhovaha vizytu trojki ABSE, čarhovy Kanhres demakratyčnych siłaŭ, na jakim vyrašyć — iści ci nia jści na vybary. Vyznačyłasia i toje, chto składaje jadro apazycyi — heta Narodny Front, AHP, sacyjał-demakraty «Narodnaj Hramady» i «Chartyja-97». Usie astatnija praciahvajuć kulacca ŭ pošukach haspadara, jaki b ich prytuliŭ, abo nadta mała značać. Hetyja najbolš upłyvovyja partyi apazycyi vykazali taksama svajo staŭleńnie da mierkavanaha Ŭsiebiełaruskaha Źjezdu i pryniaćcia Aktu niezaležnaści. Niama čaho paroć harački, nierealna arhanizavać pradstaŭničy źjezd užo ŭletku, kažuć jany, lepiej adkłaści jaho na vosień, kab heta byŭ nie čarhovy schod pary socień aktyvistaŭ, a sapraŭdy Ŭsiebiełaruski Schod, roŭny pa svaim značeńni Pieršamu i Druhomu. Ale, niahledziačy na toje, što takuju pazycyju zaniali i Ivonka Surviłła, i Siamion Šarecki, i Vincuk Viačorka, usio ž A.Starykievič i H.Buraŭkin, dva hałoŭnyja zavadatary Źjezdu, uparta stajać na svaim i nikoha pakul nia słuchajuć. Sojm BNF u subotu ŭrešcie prapanavaŭ im kampramisnaje rašeńnie — pravieści 29 lipienia nie Ŭsiebiełaruski źjezd, kab nie falšavać i nie zašmolvać hetkuju histaryčnuju nazvu, a prosta Źjezd za niezaležnaść.

M.Statkievič i V.Ščukin vystupili z pałymianymi pramovami ŭ abaronu siabie, svajoj dziejnaści i vosieńskaha Maršu Svabody na kryminalnym sudzie nad imi — pramovy hetyja vartyja taho, kab uvajści ŭ załaty fond biełaruskaj publicystyki. «Svaboda abo śmierć», — alternatyvy niama, zajaviŭ M.Statkievič. Prysud majuć vynieści na nastupnym tydni.

Uładzimier Jarmošyn prasłaviŭsia frazaj «chochły vsio ravno budut obdirať», havoračy ab pracy ŭkrainskaj mytni — raniej usio Łukašenka samaručna arhanizoŭvaŭ davoz hniłoha małdaŭskaha vinahradu, ciapier hety ŭziaŭsia. Cikava, ci daduć jamu papiaredžańnie za raspalvańnie mižnacyjanalnaj varožaści? U kožnym razie, słova nie vierabiej — Jarmošyn istotna padmačyŭ mit pra ŭłasnuju intelihientnaść. Adna z «pradsiadacielem» kampanija.

Pakul Jarmošyn łajaŭ małarosaŭ, Kučma zajaviŭ, što da 15 śniežnia zakryje-taki Čarnobylskuju AES, a baŭhary abvieścili, što na leta źmianšajuć canu vizy na ŭjezd, kab bolej turystaŭ zavabić.

Darečy, za miažu biaz bankaŭskaha dazvołu chutka možna budzie vyvozić 1,5 tysiačy dalaraŭ, a nie 500, jak ciapier — da novych praviłaŭ abaviazvaje Mytny sajuz. A voś sumu harantavanaha dziaržavaj valutnaha ŭniosku ŭ bank (to bok taho, jaki dziaržava abiacajecca kampensavać u razie, kali bank zbankrutuje) źmienšyli z 2000 da 1000.

U čaćvier na płoščy Pieramohi ŭ Miensku zabili viadomaha ŭzbeka-pradprymalnika Adžy-Asmanava. Radyjo Svaboda kaža, byccam by pryčyna — u pieradziele pravoŭ na impart u Biełaruś zbožža, što mocna vyrasła ŭ canie apošnim časam.

70 tys. žycharoŭ Miensku pieravodziać z Frunzenskaha ŭ Centralny rajon — pamianiajuć rajvykankam tyja, chto žyvie ŭ rajonie Mašerava-Kalvaryjskaj. Bo Centralny rajon — najmienšy, a Frunzenski z pabudovaj Zachadu, Masiukoŭščyny i Krasnaha Boru nadta razrośsia.

U subotniaj «Narodnaj voli» nadrukavanaje interviju ź Vińnikavaj, jakaja iznoŭ ničoha nia kaža. «LiM» u čaćvier nia vyjšaŭ — niama hrošaj na rachunku, i dziaržava ničym nia moža dapamahčy. Hetaksama zaviśli i inšyja dziaržaŭnyja datacyjnyja vydańni. To prosta zarobku nie płacili, a to ŭžo j na druk zažmyndzili.

Tymčasam u Mahilovie adbyŭsia pieršy sioleta społach dyzenteryi — zachvareła bolš za 300 čałaviek. Treba ruki myć!

B.T.