Edvard Ludovič. Źjezd artadaksalnych ramantykaŭ

Źjezd artadaksalnych ramantykaŭ

Učora ŭ mienskim DK “Sukno” adbyŭsia pieršy Kanhres biełaruskaj moładzi, na jaki sabralisia delehaty ad Maładoha Frontu, Maładoj Hramady, zubroŭ, ZBS, BPS i jašče dziasiatkaŭ supołak — usiaho za 300 čałaviek. Pradstaŭniki BPSM i BSM nie pryjšli, choć ich i zaprašali.

Kanhres musiŭ “zaćvierdzić” Hančaryka ŭ jakaści adzinaha kandydata i vypracavać stratehiju pieradvybarčaj kampanii.

U zali ŭdzielnikaŭ pa-dydžejsku vitaŭ lider MF Sieviaryniec: kožnyja piać chvilinaŭ kryčaŭ “Žyvie Biełaruś!”, “Moładź za Biełaruś!”, až vušy zakładała.

U faje pracavali tak zvanyja work-shop'y: instruktary MF i “Supolnaści” vučyli budučych “mabilizataraŭ” pravilna ŭździejničać na elektarat. Mastačka Lija Kijko malavała ŭsim achvotnym farbaj na bicepsach, trycepsach, dałoniach i paholenych patylicach lozunhi mabilizacyjnaj kampanii “Zrabi prezydenta” i “Horad — naš”.

Uračystaja častka raspačałasia himnam “Mahutny Boža”. Adčuvałasia, što z prysutnych u zali mała chto viedaje słovy.

Siarod moładzi byli zaŭvažanyja Ju.Chaščavacki, A.Trusaŭ, A.Hryckievič, V.Viačorka, R.Kijko, H.Bykaŭ, V.Siŭčyk, I.Savierčanka. Trusaŭ, jak zaŭsiody, u svaim vystupie adznačyŭ, što jašče 30 hadoŭ tamu na ludziej, jakija havaryli ŭ tramvai i metro pa-biełarusku hladzieli z padazreńniem. (Mienskaje metro było pabudavanaje ŭ 1984 h.). Jon achajaŭ rasiejskamoŭnych kandydataŭ-demakrataŭ, abrynuŭsia z krytykaj na niebiełaruski “Zubr” i prapanavaŭ bajkatavać rasiejskuju pradukcyju. Niechta z zali niaśmieła zapytaŭ: “A jak być ź pivam “Bałtyka”?” — “I piva taksama!” — rašuča adrezaŭ lider TBM.

Uładzimier Hančaryk źviarnuŭsia da delehataŭ na čystaj biełaruskaj movie. U svaim vystupie ciapierašni adziny kandydat zaklikaŭ usich niezadavolenych rašeńniem piaciorki abjadnacca: “Treba razam zmahacca za niezaležnuju Biełaruś, jakaja stanie eŭrapiejskaj krainaj, u jakoj nikoli nia budzie eskadronaŭ śmierci”. Jon paabiacaŭ, što ŭ novaj Biełarusi vialikaja ŭvaha budzie nadavacca nacyjanalnym kaštoŭnaściam, kultury i ŭ takoj krainie Vasil Bykaŭ nia budzie abvieščany palicajem ad litaratury.

Niekalki dziasiatkaŭ čałaviek rynulisia da Hančaryka pa aŭtohrafy, i nie adpuskali jaho chvilinaŭ piatnaccać. Hančaryk spadabaŭsia. Lohka ŭskočyŭ na trybunu, havaryŭ upeŭniena, ruchaŭsia naturalna.

Dźviuchhadzinny abied, jaki składaŭsia z porcyi bulby z paraj sasisak i sałacikam, azdobili biezvynikovyja pošuki bomby ŭ pamiaškańni DK i nastrojka aparatury hurtu NRM, kancert jakoha musiŭ adbycca pa skančeńni źjezdu.

Pa abiedzie vystupaŭ Siamion Domaš. Kali jon išoŭ da trybuny, zala ŭstała i avacyjami sustreła kandydata centrapravicy. Domaš paŭtary hadziny tamu prylacieŭ ź Ciumieni, kudy jaho zaprašała miascovaja biełaruskaja dyjaspara. Jon adznačyŭ, što sapraŭdnaja bomba zakładzienaja nia tut, a ŭ Administracyi prezydenta, i jana abaviazkova vybuchnie. Jahonaja pramova była pierasypanaja cytatami: “Viedaj, brat małady, što ŭ hrudziach u ludziej Sercy ćviordyja, byccam z kamieńnia”, “Ci žyć u ščaści, ci hałavu skłaści”. Paśla cytaty “Biełaruś moža trapić u ruki niaŭmiełaha hančara”, delehaty zaraŭli “Domaš, a nie Hančaryk”. Ale Domaš chitra paśmichnuŭsia i paprasiŭ padtrymać adzinaha kandydata, vyhnaŭšy ŭ vieraśni z panadvorku lichadziejaŭ svajoj hadoŭli i čužych prychvaśniaŭ. Pad huł avacyj Domaš spuściŭsia sa sceny. Amataraŭ aŭtohrafaŭ adciaśniła impravizavanaja achova.

Z astatnich vystupoŭcaŭ zapomniŭsia tolki Siaržuk Vysocki, aficyjny lider BPS, jaki vyjšaŭ na trybunu z ułasnym achoŭnikam i zaklikaŭ biełarusaŭ być bolš nacyjanalistyčnymi, fanatyčnymi i ŭtrapionymi.

Moładź prahnie pieramienaŭ i choča pracavać. Chočam, možam, pieramožam! Ale moładź kiepska razumieje dramatyzm siońniašniaje sytuacyi. Plaskała Hančaryku, ustavańniem eŭfaryčna vitała Domaša. A nadydzie 10-ha vieraśnia, i što potym? Nichto na źjeździe pra heta, jasnaja reč, nie kazaŭ. I mo navat i nia dumaŭ. Zrešty, što zahadvać na budučyniu, kali tabie 17, a na tvaich plačach – cełaja Biełaruś i cełaja prezydenckaja kampanija?

Edvard Ludovič