Alaksandar Fiaduta. Tyja ž. Biaz Mehan Ficdžerald

specyjalna dla “NN”

Tyja ž. Biaz Mehan Ficdžerald

Admova ŭ vizie apošniaj supracoŭnicy KNH ABSE, jakaja pradstaŭlała ŭ hetaj arhanizacyi eŭraatlantyčnuju supolnaść, prademanstravała, što biełaruskija ŭłady pa-raniejšamu nia zdolnyja na hulniu. Naahuł — ni na jakuju hulniu, bo dahetul jany dziejničali vyklučna łomam i finkaj, jak i naležyć narmalnamu bandytu z Brynskich lasoŭ, — vyhaniali sa svaich puščaŭ i bałotaŭ usich prychadniaŭ, niezaležna ad arhumentaŭ, jakimi tyja sprabavali abhruntoŭvać svajo prava prysutničać u našaj krainie.

Admova ŭ praciahu vizy spn.Mehan Ficdžerald była paprostu biessensoŭnaj. Hetaja maładaja pryvabnaja panienka — amerykanka, ale bolš nijakich admoŭnych z hledzišča biełaruskaje ŭłady jakaściaŭ jana nie demanstravała. Za tydzień da admovy jana z sumam skazała mnie: “Ja ž razumieju, kali heta adbudziecca, dyk zusim nie tamu, što ja takaja važnaja persona”. Miełasia na ŭvazie, što jaje vykinuć ź Biełarusi pa inercyi. Tak usio i adbyłosia. Dumaju, prezydentu pra takoje rašeńnie mahli i nie dakładać: u jaho siońnia spraŭ i tak chapaje, niama čaho za našaje dyplamatyčnaje chamstva adkaznaść na jahonyja plečy pierakładać. Bo našym zamiežnapalityčnym viedamstvam i biez taho ŭpeŭniena kirujuć dyplamaty, jakija vałodajuć tonkaściu pitekantrapaŭ i vytančanaściu dubałomaŭ.

Najaŭnaść u Miensku apošniaha zachodniaha supracoŭnika KNH adkryvała pierad biełaruskim MZS šyrokaje pole dla handlu z Zachadam. Tym bolš — viałosia pra amerykanskuju hramadzianku, jakaja bieź piaci chvilinaŭ jak vychodziła zamuž za hramadzianina Biełarusi. Ja peŭny, što šlub mis Ficdžerald adbudziecca niahledziačy na ŭsie namahańni spadara Shvastoff'a. Ale nam ad hetaha nie lahčej. Hetaja miłaja panienka mahła śpisać u vačach Zachadu ŭsio. Voś jak Pucin, ustupiŭšy ŭ antyterarystyčnuju kaalicyju, prademanstravaŭ, što Rasieja z “imperyi zła” pieratvaryłasia ŭ zrazumiełaha i całkam tavaryskaha miadźviedzia, jaki tančyć jašče nie navučyŭsia, ale na ludziej užo nia kidajecca. Tak i my — schavalisia b za amerykanku. Nie, mahli skazać my, heta ŭsio Vik paputaŭ, heta ad prasiaknutych jahonym atrutnym ducham supracoŭnikaŭ my pazbaŭlalisia. A Mehan ź im nie pracavała, tamu niachaj siadzić u Miensku i spakojna rychtujecca da viasiella. A naŭzamien, kali łaska, usio ž pierahledźcie mandat hetaj vašaj KNH.

Ciapier nichto mandat pierahladać nia budzie. Jaho pierahledzieli b, kab choć jaki krok ź biełaruskaha boku demanstravaŭ najaŭnaść dobraj voli ŭ aficyjnaha Miensku. Ciapier, navat kali hałava biełaruskaha MZS na sustrečy ŭ Ńju-Jorku z partuhalskim kaleham (jon ža — staršynia ABSE) pračytaje lekcyju ab tym, jak my tut budujem demakratyčnuju dziaržavu, — nie pavierać. Niama jak schavacca i za śpinu Rasiei. Tamtejšaje kiraŭnictva ŭžo vykazałasia vusnami sp.Svanidze, jak jano budzie dziejničać. Dla tych, chto zabyŭsia, nahadaju: Svanidze z ščyraściu naščadka starych balšavikoŭ (jon ža z tych samych Svanidze, stalinskich svajakoŭ) zajaviŭ: Rasieja stamiłasia ad taho, što ekstravahantny sajuźnik uvieś čas psuje joj reputacyju. A ŭličyŭšy, što hałasavańnie ŭ ABSE idzie pa formule “adnahałosna minus adzin”, my hetym “minus adzin” jakraz možam i akazacca. Tym bolš, naleta staršyniavać u ABSE buduć halandcy, jakija lohka mohuć pastavić pytańnie ab prypynieńni siabroŭstva Respubliki Biełarusi ŭ arhanizacyi z-za nievykanańnia stambulskaj rezalucyi. Za ŭsiu historyju ABSE takuju mieru vykarystoŭvali tolki da Juhasłavii. I my viedajem, čym dla Juhasłavii hetaja miera skončyłasia.

Cikava, dzie mienavita spadar Shvastoff prapanuje kiraŭniku našaj očań hordaj dziaržavy šukać druhi hołas? U dziaržavach SND? Ale ž sam Alaksandar Ryhoravič u paniadziełak u žyvym etery NTV faktyčna abraziŭ SND: pryhadajcie jahony vypad z nahody amorfnaści hetaj arhanizacyi i h.d. Varta ŭličyć i toje, što apošnim adkaznym supracoŭnikam KNH źjaŭlajecca jakraz hramadzianka adnoj ź dziaržaŭ SND — małdavanka Alina Žasan. I ŭ spadaryni Žasan akredytacyja skančajecca ŭ kastryčniku. Heta dla ZŠA Mehan Ficdžerald była tolki piasčynkaj u dyplamatyčnym mory, a de-fakta kiraŭnik KNH ABSE hramadzianka Małdovy Alina Žasan padvyšaje ranh svajoj krainy ŭ vačach usioj Eŭropy.

Paśla vysyłki spadaryni Žasan raźličvać na hołas małdaŭskaj delehacyi ŭ Venie nie daviadziecca.

Napieradzie ŭ nas doŭhija j ciažkija pieramovy z Rasiejaj, dzie treba sapraŭdnaja dyplamatyja. Čym mieniej nitačak łučyć nas z astatnim śvietam, tym bolej šancaŭ z razmachu vykanać maru sp.Jarašuka i ŭlacieć-taki ŭ skład Rasiejskaj Federacyi. Cikava, Jarašuk z Shvastoff'ym kansultavalisia ci nie? I čamu im abodvum tak nie padabajecca biełaruski suverenitet? I niaŭžo biełaruskamu MZS vyhodniej apynucca ŭ poŭnaj izalacyi, čym pryadčynić dla siabie fortku na Zachad, kab choć hołas było čuvać. I potym: kali vy tak nia lubicie amerykancaŭ, niaŭžo vy nia zdolnyja zrazumieć, što vyhnańnie KNH ABSE tolki ŭzmocnić ich pazycyi pa biełaruskim pytańni?

Ja ščyra zajzdrošču Mehan Ficdžerald. Vielmi chutka jana pazbavicca ad niepryjemnaha abaviazku bačyć i biełaruskija ŭłady, i biełaruskuju apazycyju. Adziny biełarus, jaki ź joj zastaniecca, budzie lubić jaje ščyra, jak tolki mohuć lubić sapraŭdnyja biełaruskija mužčyny. Darečy, a spadar Shvastoff, jon — biełarus?

Alaksandar Fiaduta