Ekanamičnaja chronika

17 studzienia 2003

Prajekt skasavańnia čekaŭ «Majomaść»

Urad padrychtavaŭ prajekt źmienaŭ u zakon «Ab imiannych pryvatyzacyjnych čekach». Pavodle jaho, tyja, chto nia vykarystaje svaich čekaŭ da 1 studzienia 2004 h., nie atrymajuć za ich hrašovaj kampensacyi. Vydavać čeki skončyli jašče ŭ 1997 h. Ich atrymali 4,9 młn. biełarusaŭ z 7,8 miljonaŭ. Na akcyi pradpryjemstvaŭ abmianianyja tolki 33,8% vydadzienych čekaŭ, bo atrymać akcyi prybytkovych pradpryjemstvaŭ niemahčyma. Padličyŭšy, što na vypłatu kampensacyjaŭ pojdzie 670 młrd. rubloŭ, urad vyrašyŭ paprostu admianić kampensacyju. Ciapier dziaržava choča adračysia ad abaviazkaŭ na 347 młn. dalaraŭ.

Padatkovy kodeks zastaniecca represiŭnym

Padpisvajučy prajekt ahulnaj častki Padatkovaha kodeksu, A.Łukašenka vykraśliŭ ź jaho liberalnyja pałažeńni. Supiarečnaści pamiž aktami padatkovaha zakanadaŭstva možna budzie tłumačyć nie na karyść padatkapłatnika. Ciaham hodu ŭłady zmohuć prymać akty, što paharšajuć stanovišča padatkapłatnikaŭ. Padatkaviki zachavajuć prava rabić asabisty nadhlad hramadzianaŭ dy ich transpartnych srodkaŭ padčas pravierak. Pryniaćcie zakonu, jaki skasuje pazasudovaje spahnańnie padatkaŭ, adkładajecca na niapeŭny termin.

Prajezd daražeje

Z 20 studzienia prajezd u mienskim transparcie padaražeje. Adna pajezdka budzie kaštavać 200 rubloŭ zamiest 180, pa lhotnym kvitku — 100 rubloŭ.

Rubiel viažuć da rubla

Rada dyrektaraŭ Nacbanku zaćvierdziła plan mierapryjemstvaŭ, adpaviedna ź jakim ciaham troch miesiacaŭ budzie razhledžanaja mahčymaść žorstkaj pryviazki biełaruskaha rubla da rasiejskaha z 1 lipienia.

Debaty vakoł «Zakonu ab nacyjanalizacyi»

13 studzienia deputaty pałaty pradstaŭnikoŭ nie zmahli damovicca z uradam nakont zakonaprajektu «Ab nacyjanalizacyi». Deputaty ličać, što nacyjanalizavać majomaść možna tolki na padstavie asobnaha zakonu, jaki musić prymacca ŭ kožnym kankretnym vypadku. Va ŭradzie miarkujuć, što nacyjanalizacyju možna pravodzić, karystajučysia adzinym zakonam, jaki budzie vyznačać paradak i ŭmovy nacyjanalizacyi, a ŭ kankretnych vypadkach karystacca pastanovami ŭradu ci prezydenckimi dekretami. Kanstytucyjny sud padtrymaŭ dumku deputataŭ.

Benzyn padaražeŭ

«Biełnaftachim» padvysiŭ ceny na naftapradukty na 5,5%. Pryčyna — padvyšeńnie stavak akcyzaŭ na paliva dy cany na naftu ŭ śviecie. Ciapier litar 76-ha benzynu na AZS «Biełnaftachimu» budzie kaštavać 715 rub., 92-ha — 890 rub., 95-ha — 1020 rub., dyzpaliva — 700 rub.

AK

• 0
• 0
• 0
• 0
• 0
• 0
• 0
• 0