Ekanamičnaja chronika

7 lutaha

Miesca — naša, vuhal — polski

Biełaruski ŭrad prapanavaŭ Polščy zbudavać elektrastancyju mahutnaściu 660 mehavat, jakaja budzie mieścicca na našaj terytoryi j pracavać na polskim vuhali. Ciapier stvarajecca biełaruska-polskaja kamisija, jakaja za 2003 hod musić raspracavać techničnyja i ekanamičnyja detali prajektu. Vuhalnaja pramysłovaść Polščy vyrablaje vuhalu bolš, čym u stanie pradać, tamu źjaŭleńnie bujnoha spažyŭca na ŭschodzie vielmi darečnaje. I nam nie zaškodzić źnižeńnie zaležnaści ad rasiejskich enerhanośbitaŭ.

Minimum raście

Z 29 studzienia siaredni pražytkovy minimum vyznačany ŭ 89557 rub. na čałavieka (raniej było 81333 rub.). Dla pracazdolnaha nasielnictva jon roŭny 95908 rub. Z 1 lutaha pamiery pensijaŭ pavialičylisia u siarednim na 7%. Minimalnaja pensija składaje 53989 rub., maksymalnaja — 155629 rub. Hrošy na padvyšeńnie vypłataŭ dla 2,4 młn. pensijaneraŭ urad znajšoŭ, skaraciŭšy vydatki na achovu zdaroŭja.

Kancesijaner nam dapamoža

RUP «Hiealohija» prapanavała ŭradu pieradać zamiežnym kampanijam radoviščy na ŭmovach kancesijaŭ (raspracoŭki za hrošy). Addavać buduć tyja, na jakija nie staje srodkaŭ: Chacisłaŭskaje pad Małarytaj (krejda j sylikatnyja piaski), Astražanskaje na Lepielščynie (bentanitavyja hliny), Haradnianskaje la Stolina (kvarcavyja piaski). Adkidy kalijnaj vytvorčaści, što hruvaściacca pad Salihorskam, taksama planujuć pierapracavać z dapamohaj kancesijaneraŭ.

Ciahačy vyciahvajuć

Urad vyrašyŭ dać Mienskamu zavodu kołavych ciahačoŭ kredyt 5 młrd. rubloŭ, kab uratavać jaho ad bankructva. Hetyja hrošy pojduć na papaŭnieńnie abarotnych srodkaŭ. Jašče adzin kredyt (3,8 młn. dalaraŭ dy 1,24 młrd. rubloŭ) urad daje MZKC, kab toj addaŭ pazyku «Mienskkompleksbanku».

«Haryzont» i «Selena»

Sioleta pradukcyja «Haryzontu», što nakiroŭvajecca na ekspart u Rasieju, budzie padzielenaja na dva brendy. Televizary «Haryzont» buduć daražejšyja dy sučaśniejšyja, «Selena» — praściejšyja, ale tańniejšyja. Letaś valutnaja vyručka «Haryzontu» skłała 23 młn. dalaraŭ, 67% pradukcyi pajšło na ekspart.

Ceny na chleb adpuścili

Chleb vykraśleny ź śpisu sacyjalna značnych tavaraŭ, ceny na jakija rehulujucca dziaržavaj. Matyvavana heta tym, što ŭ Biełarusi chleb daražejšy, čym u pamiežnych rehijonach Rasiei j Ukrainy, a rentabelnaść piakarniaŭ usio adno nizkaja. Paśla admieny dziaržaŭnaha rehulavańnia cenaŭ chleb moža padaražeć na 2—10%. U śpisie sacyjalna značnych tavaraŭ i pasłuhaŭ zastałosia 11 pazycyjaŭ z 35-ci, zaćvierdžanych u červieni 1999 h.

AK; BiełaPAN, radyjo «Svaboda»

• 0
• 0
• 0
• 0
• 0
• 0
• 0
• 0