Z 1 traŭnia Biełaruś stanie niepasrednaj susiedkaj abjadnanaj Eŭropy: da Eŭraźviazu dałučacca Polšča i Litva.
U suviazi z hetym chaču spynicca na vizycie ŭ Miensk namieśnika pamočnika dziaržaŭnaha sakratara ZŠA Styvena Pajfera. Zasłuhoŭvajuć vialikaj padziaki takija namahańni mižnarodnaj supolnaści dziela demakratyzacyi Biełarusi. Ale los Biełarusi pieradusim musim vyznačać my, jaje hramadzianie. Nakolki my hatovyja adstojvać demakratyčnyja kaštoŭnaści: svabodu ŚMI, svabodnyja vybary? Bolšaść biełarusaŭ čakajuć źmienaŭ da lepšaha. A ci hatovyja jany za heta lepšaje zmahacca, a nia prosta čakać dobraha dziadźku Sema?
Što dla zvyčajnaha abyvaciela značyć volny druk, kali jamu niama čaho apranuć ci źjeści? Što moža zrabić student, kali jamu nie dazvalajuć zdać zapazyčanaść biez ustupleńnia ŭ BRSM? Pytańni, na jakija daloka nia kožny advažycca skazać: ja čałaviek, i ja nie dazvolu za siabie vyrašać, kudy mnie ŭstupać i što mnie čytać.
Kažuć, što biełarusy nie daraśli da demakratyi. A chto daŭ prava tak sudzić? Niaŭžo j dziciaci možna admović u jaho asnoŭnych pravach, bo jašče mały?.. Čałaviek — miera ŭsiaho. I pravy asoby pieradusim. Paźniej — siamja. A tolki tady — hramadztva, dziaržava. I kali dziaržava nie daje mnie svabody ci nia zdolnaja harantavać ludzki ŭzrovień žyćcia, to našto mnie takija ŭładary? Ci ja nia maju prava svabodna vykazvać dumki, atrymlivać za pracu ludzki zarobak, patrabavać sacyjalnaj abarony? A toje, što niechta karystajecca z našaj słabaści, ź niaviedańnia, hańbić dobraje, dyk heta, ja peŭny, časova. I kaniec takich niezajzdrosny.
Čuju, što blizka toj čas, kali kožny zmoža adčuć siabie Asobaj, a nie biezdapamožnym šrubkom. I ci varta dzivicca, kali ŭžo j u starych ludziej raspluščvajucca vočy na sapraŭdny stan rečaŭ, na chłuślivaść ułady. Da nas pačnuć stavicca jak da ludziej.
Eŭropa idzie! Vitajma!
Mikoła Arciuchoŭ, Miensk
Ciapier čytajuć
Siarhiej Cichanoŭski pierabraŭsia žyć u Łos-Andželes44
Kamientary