Гомельскі доктар прадаваў бальнічныя за мяса і ласункі — чатыры гады зняволення
Набыў моц прысуд у дачыненні да доктара агульнай практыкі, які браў хабар за выдачу лісткоў часовай непрацаздольнасці.
Абвінавачваны прыгавораны да чатырох гадоў пазбаўлення волі з канфіскацыяй маёмасці і пазбаўленнем права займаць арганізацыйна-распарадчыя і адміністрацыйна-гаспадарчыя пасады на пяць гадоў.
Як паведаміў БелаПАН памочнік пракурора Гомельскага раёна Кірыл Кадоўба, медыцынскі работнік быў затрыманы ў жніўні 2013 года, крымінальная справа налічвае 14 эпізодаў. 56-гадовы ўрач агульнай практыкі, працуючы ў філіяле паліклінікі, гандляваў бальнічнымі. Пэўнай таксы за паслугі ў яго не было, не грэбаваў абвінавачваны браць у кліентаў прадукты харчавання, да прыкладу тры кілаграмы мяса за лісток непрацаздольнасці, або спіртное — піва і гарэлку. Не адмаўляўся і ад цукерак.
На судзе віну сваю доктар не адмаўляў, тлумачыў, што выдачай лісткоў непрацаздольнасці «хацеў дапамагчы людзям».
Кліенты ж прасілі ў яго бальнічныя, каб з'ездзіць у адпачынак, у вясельнае падарожжа або проста адпачыць дома.
Абвінавачваны абскардзіў прыгавор, але суд пакінуў яго ў сіле.
Нагадаем, у красавіку 2014 года ўрач са Жлобіна атрымаў шэсць гадоў турмы за гандаль бальнічнымі. Абвінавачаны на працягу двух гадоў прадаваў бальнічныя лісты работнікам Беларускага металургічнага завода. Усяго ў судзе былі разгледжаны 44 факты дачы хабару. Расцэнкі ў неўролага са Жлобіна раслі разам з курсам валюты. Так, у 2010 годзе аформіць сабе часовую непрацаздольнасць можна было за 50 тысяч рублёў, а ў 2012 годзе кошт дамашняга адпачынку каштаваў ужо 150 тысяч.
-
«Я ў калоніі быў больш вольны». Былы палітвязень Тамаз Піпія расказаў пра 6 гадоў за кратамі і новую паранаідальную беларускую рэальнасць
-
Выйшаў на свабоду палітзняволены фанат Цімур Піпія
-
«Уцякалі ад мігрантаў і гендарнай ідэалогіі». Прапаганда паказала яшчэ адну сям'ю ковід-дысідэнтаў, якая перабралася з Германіі ў Беларусь
Каментары