Смаргонка Таццяна Стахурская палола грады ў сваім падвор'і на вуліцы Камсамольскай, калі пачула за кустамі галасы мужчыны і дзвюх дзяўчынак. Па размове жанчына зразумела, што мужчына дамагаецца дзяўчынак.
Таццяна кінулася ў кусты. Там убачыла мужчыну з тэлефонам, насупраць яго стаялі дзеці.
— Што ты тут робіш? — спытала яна ў мужчыны.
— Дзяўчынкі прасілі патэлефанаваць, — прыйшоў у сябе спалоханы мужчына.
У наступнае імгненне ён адкінуў Таццяну ўбок і пабег.
Таццяна павяла дзяўчынак да бацькоў. Па дарозе спытала, чаму дзеці пайшлі за незнаёмым. Тыя адказалі, што мужчына абяцаў купіць для іх нешта смачнае.
Гэтага чалавека Таццяна бачыла гадзіну назад. Дзяўчынкі гушкаліся на арэлях, а ён сядзеў на лаўцы і глядзеў на іх. Тады жанчына і падумаць не магла нічога дрэннага.
Потым мама адной з дзяўчынак выклікала міліцыю. Следча-аператыўная група пачала дзяжурыць у Цэнтральным і Усходнім раёнах.
Каля аптэкі на вуліцы Савецкай міліцыянеры заўважылі падобнага мужчыну. Яны затрымалі яго і даставілі на месца злачынства. У ім Таццяна пазнала таго, каго бачыла ў кустах з дзяўчынкамі.
Завялі крымінальную справу. Пасля высветлілася, што ў 40-гадовага жыхара Смаргоншчыны ёсць псіхічныя адхіленні. Яго змясцілі ў псіхбальніцу ў Жодзішках.
Каментары