Загадку шматразовага перафарбоўвання маладзечанскага ручая не можа разгадаць нават пракуратура
У канцы студзеня па СМІ прайшла інфармацыя, што ў Маладзечне мясцовы ручай некалькі разоў мяняў колер, кожны раз рэзка адрозніваючыся афарбоўкай ад натуральнага для вадаёма. Цяпер мясцовая раёнка напісала, што па гэтай сітуацыі ўдалося высветліць.
«Маладзечанская газета» папрасіла пракаментаваць сітуацыю прадстаўнікоў розных мясцовых арганізацый.
Начальнік Маладзечанскай раённай інспекцыі прыродных рэсурсаў і аховы навакольнага асяроддзя Уладзіслаў Чарноў расказаў, што за чысцінёй вады ў рэках вядзецца пастаяннае назіранне і цяпер усё з імі добра. Лабараторныя аналізы, маўляў, перавышэння гранічна дапушчальных канцэнтрацый небяспечных для здароўя рэчываў у вадзе з ручая не выявілі, таму і небяспекі ніякай няма.
Пытанне ж афарбоўвання вады ўзятае пад кантроль пракуратурай Маладзечанскага раёна. І гэтая структура «ва ўзаемадзеянні з праваахоўнымі і кантралюючымі органамі» праводзіць «комплекс праверачных мерапрыемстваў, накіраваных на ўстанаўленне прычын змены колеру вады, яе якасці, а таксама выяўленне і прыцягненне да адказнасці асоб, вінаватых у гэтым».
Праўда, пакуль што пракуроры, нягледзячы на ўсе старанні, так нікога вінаватага і не выявілі: «адпрацоўваюцца розныя версіі падзей, якія маглі пацягнуць афарбоўванне вады».
Каментары