У Барысаўскім раёне ледзь не здарылася трагедыя: маленькае дзіця магло патануць у штучным вадаёме, паведамляе прэс-служба Следчага камітэта.
Увечары 28 мая ў аграгарадку Лошніца жанчына знаходзілася на тэрыторыі свайго прыватнага дома разам з двума малымі сынамі. Пакуль дзеці гулялі ў задняй частцы ўчастка, яна займалася пасадкай раслін перад домам.
Раптам маці пачула плач і пабачыла, што яе малодшы сын апынуўся ў сажалцы, якая знаходзілася на ўчастку.
Жанчына адразу дастала дзіця з вады, правяла неабходныя рэанімацыйныя дзеянні і выклікала хуткую дапамогу. На гэты момант хлопчык знаходзіцца ў бальніцы, дзе яму працягваюць аказваць неабходную дапамогу.
На месцы здарэння працавала следча-аператыўная група. Цяпер Барысаўскі раённы аддзел Следчага камітэта праводзіць праверку, каб высветліць усе абставіны гэтага выпадку.
Каментары