Уладальніца вядомай крафтавай мінскай пякарні LЁN паведаміла, што яны вымушаныя будуць закрыцца і распрадаць абсталяванне.
Прычына — скасаваная ў аднабаковым парадку дамова арэнды памяшкання на Ракаўскай 25/1, дзе знаходзілася кавярня і вытворчасць (пякарня пастаўляла выпечку і ў іншыя месцы).
«Уявіць, што калісьці нам давядзецца напісаць падобнае, мы не маглі. З нашай кампаніяй у аднабаковым парадку скасаваная дамова арэнды, і мы вымушаныя ў максімальнае кароткія тэрміны пакінуць памяшканне і спыніць працу.
Мы пяць месяцаў у судзе змагаліся за сваё права працягваць працу ў гэтым месцы, бо менавіта тут знаходзіцца не толькі наша кавярня, але і вытворчасць і скасаванне дамовы па факце азначае страту кампаніі. На жаль, учора мы прайгралі апеляцыйны суд», — расказала ў інстаграме ўладальніца LЁN Алена Казлоўская.
«Мы прынялі рашэнне, што далейшае змаганне не адпавядае тым мэтам, дзеля якіх ствараўся гэты праект. Мы будзем працаваць да 21 чэрвеня ўключна і чакаем кожнага з вас у госці. Дапамагчы вы можаце, калі паведаміце тым, каму гэта можа быць цікава, пра продаж абсталявання».
У красавіку пякарня на Ракаўскай адсвяткавала сваё пяцігоддзе, за гэты час яна стала папулярным месцам не толькі ў мінчукоў, якія ехалі сюды па свежую выпечку нават з іншага канца горада, але і ў турыстаў. Тут можна было сытна паснедаць і пакаштаваць самыя розныя дэсерты — ад партугальскіх паштэйшаў да італьянскіх панетонэ і французскіх круасанаў ці кішаў. Выпякалі ў LЁN таксама ўласны хлеб.
Сталыя наведвальнікі «Лёну» дагэтуль не вераць у дрэнныя навіны і просяць адкрыцца ў любым іншым месцы.
«Я не магу ўявіць Мінск без «Лёну». Для мяне гэта месца як душа горада»; «Ваша пякарня стала для нас другім домам, у вас было вельмі цёпла і ўтульна», — множацца каментары пад пастом пра закрыццё.
Але на дадзены момант уладальнікі кавярні не бачаць для сябе мэтазгодным пераносіць бізнэс у іншую лакацыю.
Цяпер чытаюць
Стаў вядомы прысуд экс-памочніку Лукашэнкі Ігару Брыло3
Каментары