Vice-premjer upeŭnieny, što kali b biełarusy nie kuplali impartnyja tavary, nijakaj devalvacyi nie było b.
Takoje mierkavańnie vice-premjer Piotr Prakapovič vykazaŭ žurnalistam, naviedvajučy TDA «Panda» ŭ Breście ŭ ramkach vyjaznoha pasiadžeńnia Savieta pa raźvićci pradprymalnictva ŭ Respublicy Biełaruś. Vice-premjer kanstatavaŭ, što dola impartu pastajanna raście. Kali 10 hadoŭ tamu jana składała 10-15%, to pa vynikach 2013 hoda vyrasła da 30%.
«Astatniaje my možam vyrablać sami. Lepšaj jakaści i pa dobrym košcie», — skazaŭ Piotr Prakapovič.
U pryvatnaści, vialiki rezierv jon bačyć u lohkaj pramysłovaści, tut dla biźniesu stvoranyja nieabmiežavanyja mahčymaści. Piotr Prakapovič ličyć, što kali b hrošy, jakija biełarusy «ŭkładajuć» u ekanomiki inšych dziaržaŭ, addajučy pieravahu impartnym tavarach, byli vydatkavanyja ŭnutry krainy, «u nas naohuł nijakich prablem nie było b».
«Pa-pieršaje, dachody nasielnictva raśli b bolš chutkimi tempami. Pa-druhoje, valuty ŭ nas zastałosia b stolki, što stanoŭčaje salda było b niekalki miljardaŭ dalaraŭ, i naš rubiel nie toje što nie devalvavaŭsia b, ale pastupova ŭmacoŭvaŭsia, byŭ adnoj z samych ustojlivych valut, — skazaŭ Piotr Prakapovič. — Takim čynam, stymulujučy impart, my paharšajem svoj žyćciovy ŭzrovień: za košt taho, što hublajem pracoŭnyja miescy, padatki».
U suviazi z hetym jon dadaŭ: zadača, jakaja stavicca pierad ajčynnymi vytvorcami, zaklučajecca ŭ tym, kab zabiaśpiečyć bolš chutkaje, efiektyŭnaje adnaŭleńnie svaich pazicyj na ŭłasnym rynku. Zavajavaŭšy jaho, Biełaruś budzie mieć bolš mahčymaściaŭ i dla naroščvańnia ekspartu.
«Zadača składajecca ŭ tym, kab vykanać daručeńnie kiraŭnika dziaržavy, jakoje jon daŭ napiaredadni ŭsim orhanam ułady, pradpryjemstvam i biźniesu, — abaraniać svoj rynak, raźvivać jaho, zrabiŭšy takim, kab jon zabiaśpiečvaŭ jak patrebnaści nasielnictva krainy, tak i ekspart», — padkreśliŭ vice-premjer. Biełaruś zaŭsiody śpiecyjalizavałasia na vyrabie tavaraŭ dla nasielnictva (i charčavańnia, i lohkaj pramysłovaści, tavaraŭ bytu), jana moža heta rabić. Adnak pracavać treba bolš dynamična, čym heta rabiłasia da hetaha času.
Kamientary