Uviečary vajskovy narad u składzie načalnika patrulnaj hrupy 3-j patrulnaj roty 1-ha patrulnaha bataljona v/č 5525 (Homiel) starejšaha siaržanta Andreja Ibrahimava i aŭtapatrulnaha jafrejtara Dzianisa Kavalova dastaviŭ čarhovaha zatrymanaha na miedycynski ahlad u narkadyspansier, paviedamlaje pres-słužba MUS.
Kiroŭca radavy Uładzisłaŭ Savietnikaŭ čakaŭ tavaryšaŭ pa słužbie kala mašyny. Niečakana jon pačuŭ žanočy płač, jaki danosiŭsia z boku Sielmašaŭskaha mosta. Padyšoŭšy bližej, radavy Savietnikaŭ ubačyŭ dziaŭčynu na vyhlad 15—16 hadoŭ, jakaja idzie chistkaj chadoj pa moście. Raptam jana pasprabavała pieraleźci praz aharodžu. Uładzisłaŭ kryknuŭ: «Što vy robicie?». Žančyna krychu sumiełasia i pajšła dalej. Ale tolki vajskoviec vyrašyŭ viarnucca da aŭtamabila, jak ubačyŭ, što jana ŭsio-tki pieralezła praz aharodžu i źbirajecca skočyć uniz.
Radavy Savietnikaŭ kinuŭsia pa dapamohu da načalnika patrulnaj hrupy. U ličanyja imhnieńni jany viarnulisia da mosta. Pakul Dzianis Kavaloŭ i Uładzisłaŭ Savietnikaŭ adciahvali ŭvahu dziaŭčyny, Andrej Ibrahimaŭ schapiŭ jaje za ruki, sumiesnymi namahańniami pieraciahnuŭšy na piešachodnuju darožku mosta.
Što padšturchnuła dziaŭčynu rašycca na taki adčajny krok, vyśviatlali ŭžo ŭ Čyhunačnym RAUS supracoŭniki inśpiekcyi pa spravach niepaŭnaletnich, kudy jaje dastaviŭ vajskovy narad. Viadoma, što ŭ hety lutaŭski viečar vajskoŭcy vyratavali dvaich — žančynu i jaje pakul nie narodžanaje dzicia.
Kamientary