Makiej sustreŭsia z pradstaŭnikom niamieckaha Fondu Ebierta, jaki dvojčy zakryvali ŭ Biełarusi
kommersant.ru
Kiraŭnik MZS Biełarusi Uładzimir Makiej sustreŭsia z kiraŭnikom kijeŭskaha pradstaŭnictva Fondu imia Frydrycha Ebierta Štefanam Mojzieram i pasłom Hiermanii ŭ Biełarusi Pieteram Detmaram. Pavodle dadzienych pres-słužby MZS, surazmoŭcy abmierkavali «aktualnyja pytańni biełaruska-hiermanskich adnosinaŭ».
Adznačym, što ŭ Biełarusi niaprostaja historyja ŭzajemaadnosin z hetym niamieckim fondam. Upieršyniu jaho pradstaŭnictva adkryłasia ŭ Minsku ŭ 1997 hodzie. Jano zajmałasia padtrymańniem kantaktaŭ ź dziaržaŭnymi ŭstanovami, NDA, praviadzieńniem adukacyjnych sieminaraŭ dla moładzi, prafsajuzaŭ, pradstaŭnikoŭ orhanaŭ miascovaha samakiravańnia, žurnalistaŭ, transpartnikaŭ i h.d. Doŭhi čas fond Ebierta byŭ adzinym zamiežnym palityčnym fondam, jaki lehalna pracavaŭ u Biełarusi.
U 2006 hodzie biełaruskaje pradstaŭnictva fondu źviarnułasia ŭ MZS prośbaj ab praciahu dazvołu na pracu ŭ Biełarusi, bo stary dazvoł skončyŭsia. Jaho fond Ebierta tady nie atrymaŭ i ŭ krasaviku 2008 hoda zajaviŭ ab zhortvańni pracy ŭ Biełarusi. Paŭhadavyja pieramovy ź Minskam skončylisia paśpiachova, i dazvoł fondu vydali ŭ listapadzie taho ž hoda.
Z tych časoŭ hety dazvoł pradaŭžaŭsia raz u hod, pakul u śniežni 2011 hoda, na chvali paharšeńnia adnosin Biełarusi ź ES, fond nie atrymaŭ admovu. Jak rastłumačyŭ pres-sakratar biełaruskaha MZS Andrej Savinych, takoje rašeńnie było pryniata ŭ suviazi z tym, što dziejnaść fondu Ebierta «nie ŭ poŭnaj miery adpaviadaje kryteram kanstruktyŭnaha ŭzajemadziejańnia z orhanami dziaržaŭnaha kiravańnia Biełarusi». Akramia taho, zajaviŭ Savinych, na hetaje rašeńnie paŭpłyvała «rezkaja radykalizacyja pazicyi Hiermanii ŭ dačynieńni da Biełarusi».
Z tych časoŭ, vykanańnie funkcyj pradstaŭnictva ŭ Biełarusi było pieradadziena pradstaŭnictvu fondu Ebierta va Ukrainie. Kiraŭnik mienavita hetaha pradstaŭnictva Štefan Mojzier siońnia pravioŭ sustreču z Uładzimiram Makiejem.
Uličvajučy novuju narmalizacyju adnosin Biełarusi ź ES, nie vyklučana, što baki abmiarkoŭvali adnaŭleńnie pracy fondu ŭ Biełarusi.
Fond Frydrycha Ebierta źjaŭlajecca adnym z najstarejšych niamieckich palityčnych fondaŭ, blizkim da Sacyjał-demakratyčnaj partyi Hiermanii, jakaja ŭvachodzić u kirujučuju kaalicyju. Jon byŭ zasnavany ŭ 1925 hodzie i nazvany ŭ honar pieršaha ŭ historyi Hiermanii demakratyčna abranaha kiraŭnika dziaržavy. Pradstaŭnictvy fondu pracujuć bolš čym u 100 krainach.
Kamientary