Były supracoŭnik śpiecsłužbaŭ ZŠA Edvard Snoŭden, vystupajučy ŭ režymie videakanfierencyi 20 lutaha, zajaviŭ svaim prychilnikam u amierykanskim štacie Ńju-Hempšyr, što hatovy da ekstradycyi na radzimu z Rasii. Uzamien jon patrabuje ad uładaŭ ZŠA harantyi spraviadlivaha sudovaha pracesu.
«Ja skazaŭ ŭradu ZŠA, što viarnusia, kali jon harantuje mnie sumlenny sud, na jakim ja zmahu vystupić u abaronu intaresaŭ hramadstva i rastłumačyć matyvy svaich dziejańniaŭ, z tym, kab rašeńnie vynies sud prysiažnych», — paviedamiŭ Snoŭden hledačam.
Arhanizatary palityčnaha forumu, na jakim vystupiŭ vykryvalnik amierykanskich śpiecsłužbaŭ, nie dazvolili ŚMI zrabić videazapis jaho pramovy, pieradaje ahienctva AP. Snoŭden taksama raspavioŭ, što niekatoryja jaho byłyja kalehi z Centralnaha raźviedvalnaha ŭpraŭleńnia (CRU) i Ahienctva nacyjanalnaj biaśpieki (ANB) padzialajuć jaho pierakanańni, adnak jość i tyja, «chto zajaŭlaje, što kanstytucyja nie maje značeńnia».
U červieni 2015 hoda ŭ vyniku vykryćciaŭ Snoŭdena ŭ ZŠA była praviedziena reforma śpiecsłužbaŭ, u ramkach jakoj byŭ źmienieny antyterarystyčny zakon, viadomy pad nazvaj «Patryjatyčny akt». Jon byŭ pryniaty paśla teraktaŭ 11 vieraśnia 2001 hoda i daŭ amierykanskim śpiecsłužbam šyrokija paŭnamoctvy, pryčym jaho dziejańnie pastajanna praciahvałasia. Ciapier ža śpiecsłužby, uklučajučy ANB, pazbaŭleny prava samastojna źbirać i zachoŭvać dadzienyja ab telefonnych pieramovach amierykancaŭ.
U 2013 hodzie były supracoŭnik CRU i ANB ahałosiŭ zasakrečanuju infarmacyju śpiecsłužbaŭ ZŠA ab pravodzimym imi masavym elektronnym sačeńni za miljonami hramadzian pa ŭsim śviecie i ab prasłuchoŭcy telefonaŭ palityčnych lidaraŭ inšych krain. Paśla hetaha Snoŭden atrymaŭ časovy prytułak, a zatym - vid na žycharstva ŭ Rasii.
Ciapier čytajuć
«Biada, na vialiki žal, užo stupaje na paroh Siniavokaj». Ultymatum Zialenskaha Łukašenku: što budzie dalej?61
Kamientary