U žurnalista-fryłansiera chočuć zabrać majomaść. Kali nie spłacić štrafy
Sudovy vykanaŭca adździełu prymusovaha vykanańnia Centralnaha rajonu Homiela Tamara Łabieźnikava patrabuje ad homielskaha žurnalista-fryłansera Kastusia Žukoŭskaha ciaham 7 dzion spłacić 6-miljonny štraf.
Štraf byŭ vyniesieny Karmianskim rajonnym sudom sioleta ŭ studzieni za videasiužet na telekanale «Biełsat» — pra pieraboi z zabieśpiačeńniem žycharoŭ rajcentru pitnoj vadoj. Pastanovu ab pačatku vykanaŭčaj spravy Žukoŭski atrymaŭ na vychodnych praz poštu.
«Raniej, — kaža Kastuś Žukoŭski, — sudovy vykanaŭca prychodziła da mianie dadomu j papiaredžvała, što kali ja nie spłaču nakładzienyja na mianie štrafy, to budzie apisana j kanfiskavana siamiejnaja majomaść na ich pahašeńnie. Letaś, dziakujučy dobrym ludziam i arhanizacyjam, ja zdoleŭ sabrać i zapłacić 31 miljon rubloŭ za fryłanserskuju dziejnaść. Ale sioleta dadałosia jašče 36 miljonaŭ štrafnych sankcyjaŭ. Mianie prosta vyžyvajuć z prafesii, nie zvažajučy na toje, što ja nie źjaŭlajusia štatnym supracoŭnikam «Biełsatu» i mnie nie patrabujecca akredytacyja, i što pavodle biełaruskaj Kanstytucyi ja maju prava jak hramadzianin na zbor i raspaŭsiud infarmacyi. Vyhladaje, što ŭładam prosta nie daspadoby navat sacyjalnaja infarmacyja, jakuju jany nie kantralujuć».
Tym časam na 6 krasavika Kastusia Žukoŭskaha znoŭ vyklikajuć u sud — hetym razam Śvietłahorskaha rajonu, dzie maje razhladacca čarhovy administracyjny pratakoł za nibyta niezakonny vyrab i raspaŭsiud pradukcyi ŚMI. U lutym na telekanale «Biełsat» pakazali siužet «Pryrodnaje niaščaście na Homielščynie» — pra masavy mor ryby z pryčyny niedachopu kisłarodu na Sasnovaborskim vadaschoviščy ŭ Śvietłahorskim rajonie. Adnak ni arhanizacyja, na balansie jakoj vadajom, ni miascovyja čynoŭniki nijakich zachadaŭ nie parupilisia zrabić, a na skarhi tutejšych rybakoŭ nie reahavali. Milicyja pravodziła raśśledavańnie, ale nia moru ryby — vyjaŭlała, chto hutaryŭ ź miascovymi žycharami i vykłaŭ u internet infarmacyju, jakoj skarystaŭsia telekanał «Biełsat»
Kamientary