Kiraŭnictva Biełaruskaha mietałurhičnaha zavoda (AAT «BMZ» — kampanija-kiraŭnik chołdynha «BMK») pryniało rašeńnie supracoŭničać ź Jeŭrakamisijaj u miežach raspačataha ŭ dačynieńni da biełaruskaha vytvorcy antydempinhavaha rasśledavańnia i zarehistravała pradpryjemstva ŭ jakaści zacikaŭlenaj asoby, havorycca ŭ kamientaryi na aficyjnym sajcie BMZ.
«Jeŭrapiejskaja kamisija atrymaje adkazy na ŭsie pytańni, jakija jaje cikaviać, i rastłumačeńni, nieabchodnyja dla pryniaćcia adpaviednych rašeńniaŭ. U svaju čarhu pradpryjemstvam dla kansultacyj buduć pryciahnutyja daśviedčanyja advakaty, jakija sumiesna sa śpiecyjalistami i subjektami ŭłasnaj tavarapravodnaj sietki vykanajuć usie mierapryjemstvy, nieabchodnyja dla kvalifikavanaj achovy BMZ u antydempinhavym rasśledavańni. Akazać padtrymku taksama pahadzilisia roznyja struktury i kamiercyjnyja partniory», — havorycca ŭ paviedamleńni.
Na BMZ udakładnili, što «apošnija hady hałoŭnaj prablemaj suśvietnaj mietałurhii stała značnaje źnižeńnie ŭzroŭniu spažyvańnia mietałapradukcyi, što pryviało da farmiravańnia zališniaj prapanovy i rezkaha padzieńnia cen na rynku». «Takija składanyja ŭmovy baluča ŭdaryli pa ekanomicy pradpryjemstvaŭ, pieraviali ŭ razrad stratnych mnohich jašče niadaŭnich lidaraŭ haliny. Situacyja, što miažuje z baraćboj za vyžyvańnie, vymušaje mietałurhaŭ źviartacca pa padtrymku da ŭradaŭ svaich krain. Adnym z najbolš raspaŭsiudžanych miechanizmaŭ achovy vytvorcami svaich intaresaŭ źjaŭlajecca inicyjavańnie antydempinhavych rasśledavańniaŭ z metaj uviadzieńnia dadatkovych pošlin», — ličać na pradpryjemstvie.
Nahadajem, Jeŭrakamisija 31 sakavika raspačała antydempinhavaje rasśledavańnie ŭ dačynieńni da Biełaruskaha mietałurhičnaha zavoda pa eksparcie ŭ ES haračakačanaj armatury. Adpaviednaja skarha była padadzienaja 15 lutaha 2016 hoda Jeŭrapiejskaj asacyjacyjaj vytvorcaŭ stali (Eurofer) pavodle daručeńnia pradpryjemstvaŭ, jakija kantralujuć bolš za 25% rynku armatury ŭ Jeŭrasajuzie.
U pryvatnaści Eurofer skardzicca na vialikija abjomy pastavak armatury ź Biełarusi pa niarynkavych cenach, što admoŭna paŭpłyvała na abjomy prodažu i ceny na rynku ES i, jak śledstva, niespryjalna adbiłasia na finansavym stanoviščy šerahu jeŭrapiejskich vytvorcaŭ. U miežach rasśledavańnia budzie vyvučany pieryjad z 1 studzienia pa 31 śniežnia 2015 hoda. Pry hetym vyvučeńnie tendencyj rynku budzie achoplivać pieryjad z 1 studzienia 2012 hoda pa 31 śniežnia 2015 hoda.
Biełaruski mietałurhičny zavod byŭ zaprošany Jeŭrakamisijaj da ŭdziełu ŭ pracy kamisii pa rasśledavańni.
Kamientary