Biełaruś znoŭ apynułasia ŭ śpisie samych nieemacyjnych krain. Na pytańnie ab tym, jakija pačućci jany adčuvali ŭčora, mnohija našy suajčyńniki nie zhadali ni pazityvu, ni niehatyvu. Pra heta paviedamlajuć aŭtary daśledavańnia Global Emotions 2018, jakija vyvučyli «hradus» nastrojaŭ u bolš čym 145 krainach śvietu.
«Indeks vymiaraje niemateryjalnyja aktyvy — pačućci i emocyi ludziej, — a tradycyjnyja ekanamičnyja pakazčyki, takija jak VUP, nikoli nie ŭličvajuć», — tłumačać aŭtary Global Emotions 2018.
Pytańni byli padzielenyja na dva błoki: pazityŭnyja i niehatyŭnyja pieražyvańni na praciahu papiaredniaha dnia. Naprykład, ci stavilisia da vas z pavahaj, ci dastatkova vy śmiajalisia i ŭśmichalisia, rabili niešta cikavaje abo vučylisia čamuści, adčuvali radaść. A taksama, u procivahu, ci adčuvali vy tryvohu, sum, stres abo hnieŭ ŭčora.
Voś, naprykład, karta z 147 krain pa vynikach apytańnia ab pazityŭnych emocyjach (čym ciamniej — tym vyšej adznaka). U lidarach — Parahvaj, Kałumbija, Salvador, Hvatemała, Kanada, Kosta-Ryka, Ekvador, Handuras, Isłandyja, Indaniezija, Panama i Uźbiekistan.
Ekśpierty adznačajuć: mienavita krainy Łacinskaj Amieryki pieravažna adroźnivajucca najbolšym pazityvam. Ale na heta mohuć upłyvać kulturnyja asablivaści rehijonu.
A radziej ab pazityvie zhadvali respandenty ź Biełarusi, Jehipta, Čarnahoryi, Sierbii, Iraka, Makiedonii, Turkmienistana, Efiopii, Niepała, Turcyi, Tunisa, Jemiena - i, narešcie, Afhanistana. Niekatoryja z hetych krain pieražyvajuć ŭnutranyja abo źniešnija kanflikty, akcentujuć ŭvahu daśledčyki.
Cikava, što tolki prykładna pałova z apytanych (46%) adznačyli, što ŭčora jany navučylisia abo rabili niešta cikavaje. Čaściej heta adbyvałasia ŭ krainach, adznačanych bolš ciomnym koleram:
Što tyčycca niehatyŭnych pieražyvańniaŭ, to sa 146 krain čaściej pra heta kazali ŭ CAR, Iraku, Paŭdniovym Sudanie, Čadzie, Śjera-Leone, Jehipcie, Iranie, Nihiery, Paleścinie, Libieryi, Madahaskary, Uhandzie. Pryčym u krainie-lidary hetaha śpisu apytańnie ŭdałosia pravieści tolki siarod 40% nasielnictva - u 2017-m adnavilisia bai pamiž ŭzbrojenymi hrupoŭkami, ludzi byli vymušanyja pakinuć doma, i hetym kryzisam možna rastłumačyć ich pačućci.
Darečy, Biełaruś apynułasia ŭ śpisie krain, dzie ludzi radziej zhadvajuć niehatyŭny vopyt. Akramia jaje, śpis zaviaršajuć Bałharyja, Maŭrytanija, Niderłandy, Novaja Ziełandyja, Šviecyja, Manholija, Polšča, Rasija, Azierbajdžan, Uźbiekistan, Estonija, Kazachstan, Kyrhyzstan i Tajvań.
Takim čynam, daśledčyki adnosiać Biełaruś da najmienš emacyjnych krain. Tut, jak jašče ŭ Jemienie i Azierbajdžanie, tolki mienš za čatyry ź dziesiaci apytanych zajavili, što napiaredadni adčuvali niehatyŭnaje abo pazityŭnaje pačućcio. A voś samymi emacyjnymi apynulisia CAR, Pieru i Śjera-Leone.
Daśledavańnie pravodziłasia centram Hełapa ŭ 2017 hodzie mietadam telefonnaha abo intervju tvaram da tvaru. Byli apytanyja bolš za 154 tysiač čałaviek va ŭzroście ad 15 hadoŭ i starej. Ŭzrovień dakładnaści apytańnia składaje 95%.
-
Polskaja daślednica biełaruskaj identyčnaści maryć pra pomnik «kułaku» ŭ Minsku i čakaje, kali Biełaruś znoŭ adkryjecca śvietu
-
Biełarus, jaki adsiadzieŭ u Tambovie, zavis miž niebam i ziamloj — Rasija choča departavać, a Biełaruś pytajecca: chto heta?
-
Mama studentki-vydatnicy raskazała pra vydatki na vypuskny
Kamientary