Razzłavany aršaniec prymusiŭ znajomuju prajścisia hołaj pa vulicy
U Połacku 40-hadovy aršaniec vyrašyŭ adpomścić znajomaj za staruju kryŭdu. Dla hetaha jon pahrozami fizičnaj raspravy prymusiŭ jaje raspranucca dahała i aholenaj prajścisia pa vulicy i zajści ŭ kramu. Padrabiaznaściami dzielicca vitebsk.biz.
Hetaja historyja pačałasia letam 2018 hoda z taho, što 44-hadovaja pałačanka razam ź siabroŭkaj skrała televizar u adnaho z žycharoŭ horada. Pradać kradzienaje jany paprasili znajomaha žychara Oršy, jaki časta pryjazdžaŭ u Połack. Jamu nie paviedamili pra toje, što televizar kradzieny. Paśla aršaniec za prodaž kradzienaha byŭ aštrafavany na bujnuju sumu, a zładziejki asudžanyja.
Praz paru miesiacaŭ žychar Oršy znoŭ pryjechaŭ u Połack (na hety raz z synam-daškolnikam). Zajšoŭšy ź dziciem u hości da siabroŭ na čarku, jon ubačyŭ tam 44-hadovuju zładziejku.
«Kali ŭdzielniki zastolla prystojna vypili, aršaniec uspomniŭ historyju z kradzienaj technikaj, — raspaviadaje pamočnik prakurora Połackaha rajona Raman Hurčonak. — Jon staŭ vinavacić sabutelnicu, što jana padstaviła jaho. Patrabavaŭ kampiensacyju za vypłačany štraf. Žančyna admaŭlałasia addavać hrošy. Tady žychar Oršy paru raz udaryŭ jaje rukami pa ciele. Potym vyrašyŭ jaje zhańbić.
Śpiarša staŭ patrabavać, kab jana raspranułasia. Pałačanka admaŭlałasia. Zatym znoŭ staŭ pahražać źbićciom. Jana źniała adzieńnie, zastajučysia ŭ trusach. Jon zahadaŭ raspranacca całkam, ale atrymaŭ admovu. Tady jon nažnicami razrezaŭ humku ad trusoŭ achviary. I zahadaŭ aholenaj vyjści na vulicu».
Pa słovach Ramana Hurčonka, bajučysia źbićcia, žančyna vyjšła na vulicu. Usio heta adbyvałasia na vačach dziciaci mužčyny. Pa darozie žychar Oršy šturchnuŭ aholenuju žančynu ŭ kalidory doma dla paskareńnia chady. Jana ŭpała, ale ŭstała i pajšła za im.
Pa patrabavańni ahresara jaho achviara prajšła kala 100 mietraŭ da najbližejšaj kramy. I ŭvajšła ź im i jaho dziciem u handlovy zał. Pradaŭcy i pakupniki, aburyŭšysia źjaŭleńniu aholenaj žančyny, vyklikali milicyju.
Padčas rasśledavańnia kryminalnaj spravy abvinavačvany całkam pryznaŭ svaju vinu. Sudom žycharu Oršy pryznačana kančatkovaje pakarańnie — pazbaŭleńnie voli terminam na 1 hod 8 miesiacaŭ z adbyvańniem u papraŭčaj kałonii va ŭmovach strohaha režymu. Prysud ustupiŭ u zakonnuju siłu.
Kamientary