Pravasłaŭnaja carkva atrymała papiaredžańnie ad dziaržavy. Jašče adno takoje — i mohuć zabaranić dziejnaść
Biełaruskaj pravasłaŭnaj carkvie vynieśli papiaredžańnie i pryhrazili, što mohuć zabaranić jaje dziejnaść.
Z dakumienta, jaki akazaŭsia ŭ rasparadžeńni Redakcyi, vynikaje, što 27 listapada Upaŭnavažany pa spravach relihii i nacyjanalnaściaŭ (tady hetu pasadu zajmaŭ Leanid Hulaka) vynies papiaredžańnie Biełaruskaj pravasłaŭnaj carkvie. U papiaredžańni havorycca, što carkva abaviazana prytrymlivacca artykuła 16 Kanstytucyi i artykuła 8 zakona «Ab svabodzie sumleńnia i relihijnych arhanizacyj».
Kali parušeńnie paŭtorycca na praciahu hoda, sud moža pazbavić Biełaruskuju pravasłaŭnuju carkvu jurydyčnaha statusu i zabaranić jaje dziejnaść na terytoryi Biełarusi.
U artykule 16 Kanstytucyi pišacca, što zabaraniajecca dziejnaść relihijnych arhanizacyj, jakaja skiravana suprać suvierenitetu Biełarusi i kanstytucyjnaha ładu. A ŭ artykule 8 zakona «Ab svabodzie sumleńnia i relihijnych arhanizacyj» — što carkva nie ŭdzielničaje ŭ dziejnaści palityčnych partyj, a ŭ miescach nabaženstvaŭ nie dapuskajecca mitynhaŭ i ahitacyi.
U adnoj ź jeparchij «Našaj Nivie» paćvierdzili, što taki dakumient atrymlivali. Ale z čym kankretna źviazana papiaredžańnie, tam nie viedajuć.
Upaŭnavažany pa spravach relihii i nacyjanalnaściaŭ Alaksandr Rumak admoviŭsia kamientavać situacyju i nazvać pryčyny papiaredžańnia.
Pradstaŭniki pravasłaŭnaj carkvy nie raz asudžali hvałt. Tak, u žniŭni hrodzienski archijepiskap Arciemij vystupiŭ z pałymianym kazańniem:
«Treba havaryć. Vučycca ŭ ich, u moładzi! A toj, chto starejšaje pakaleńnie, jakoje burčyć, nastaŭniki: «My tam palityku ŭbačyli» — vam na kaleniach treba stajać, za ŭsie falsifikacyi, za tuju chłuśniu, jakuju vy pchali našym dzieciam! Za hety BRSM, za kamsamoł, za ŭsio toje, što było… ateistyčnaje. Voś vynik vašaha vychavańnia! Ciapier vašy vychavancy z łancuha sarvalisia! Jany prahnuć kryvi. Jany šalonyja».
A ŭ kancy listapada z pasady pres-sakratara syšoŭ Siarhiej Lepin, jaki asudziŭ razbureńnie siłavikami narodnaha miemaryjała pamiaci Ramana Bandarenki.
Čytajcie taksama:
Archijepiskap hrodzienski — nastaŭnikam: «Vam na kaleniach treba stajać, za ŭsie falsifikacyi, za tuju chłuśniu»
Pres-sakratar BPC Siarhiej Lepin napisaŭ zajavu na zvalnieńnie
Ciapier čytajuć
«Biada, na vialiki žal, užo stupaje na paroh Siniavokaj». Ultymatum Zialenskaha Łukašenku: što budzie dalej?32
Kamientary